సాలె పురుగులతో ఇబ్బందా

సాధారణంగా ఇంట్లో పైకప్పు మీద, సామాన్ల మధ్య సాలె పురుగులు గూళ్లు అల్లుతూ ఉంటాయి. ఇవి అంత ప్రమాదకరం కానప్పటికీ వీటివల్ల ఇల్లు అపరిశుభ్రంగా ఉందనే భావన వస్తుంది. ఈ సాలె పురుగులను సులువుగా తొలగించే చిట్కాల గురించి తెలుసుకుందాం...

• అయిదు వెల్లుల్లి రెబ్బలను కచ్చాపచ్చాగా దంచి ఒక స్ర్పే బాటిల్‌లో వేసి నిండుగా నీరు పోయాలి. రాత్రంతా నాననివ్వాలి. ఉదయాన్నే ఈ నీటిని సాలె పురుగులు గూళ్లు అల్లే ప్రదేశాల్లో పిచికారీ చేస్తే అవి వెంటనే బయటికి వెళ్లిపోతాయి. మళ్లీ రావు.

• కర్పూరం, తులసి, లావెండర్‌, సిట్రోనెల్లా, పుదీనా నూనెల్లో ఒకదాన్ని తీసుకుని ఒక గ్లాసు నీళ్లలో అయిదు చుక్కలు వేసి బాగా కలపాలి. ఈ నీటిని గది మూలలు, తలుపు సందులు, కిటికీల వద్ద చల్లితే సాలె పురుగులు చేరవు. ఇల్లు సువాసనతో నిండుతుంది.

• ఒక బకెట్‌ నీళ్లలో రెండు చెంచాల వెనిగర్‌ లేదా నిమ్మరసం వేసి బాగా కలపాలి. ఈ నీటిలో స్పాంజ్‌ లేదా పలుచని బట్టను ముంచి దానితో ఫర్నిచర్‌, ఫ్యాన్లు, బల్బులు, తలుపులు తదితరాలను తుడిచేస్తే సమస్య తీరుతుంది.

• గది మూలల్లో, సోఫాకి ఇరుపక్కలా, వంటగది కిటికీలో, బాల్కనీ గోడల మీద పుదీనా, రోజ్‌మేరీ, లావెండర్‌ మొక్కల కుండీలు ఉంచినా మంచి పలితం కనిపిస్తుంది. ఈ మొక్కలు ఇంట్లో తాజాదనాన్ని నింపుతాయి.

• నిమ్మ, కమలాలు, బత్తాయిలాంటి సిట్రస్‌ పండ్ల తొక్కలను ఎండబెట్టి ఒక గిన్నెలో వేసి గది మూలల్లో ఉంచితే సాలె పురుగులు రావు.

• ఒక చెంచా బేకింగ్‌ సోడా లేదా పొగాకు పొడి కలిపిన నీళ్లను గది మూలల్లో పిచికారీ చేస్తే వెంటనే ఫలితం కనిపిస్తుంది.

• కనీసం ఆర్నెలకు ఒకసారి ఇంటిని పూర్తిగా శుభ్రం చేసుకుని అవసరం లేని సామాన్లను తొలగిస్తే సాలెపురుగులు చేరవు.

ఇవి కూడా చదవండి

పాత బాకీ అడిగితే ఇలా కొడతారా..

మహా న్యూస్ పై దాడిని తీవ్రంగా ఖండించిన చంద్రబాబు, లోకేష్