Trump Trade Attack: సుంకాలు విధించకుండానే మోసం

• అమెరికాతో వాణిజ్యం చేసే దేశాలపై ట్రంప్‌ మరోసారి ఫైర్‌

• పలు పరోక్ష, అనైతిక పద్ధతుల్లో అమెరికాకు నష్టం చేస్తున్నాయని విమర్శ

వాషింగ్టన్‌, ఏప్రిల్‌ 21: సుంకాల యుద్ధానికి 90 రోజుల విరామం ప్రకటించిన అమెరికా అధ్యక్షుడు ట్రంప్‌.. తమతో వాణిజ్యం చేసే దేశాల మీద మరోసారి విరుచుకుపడ్డారు. పలు పరోక్ష, అనైతిక విధానాల ద్వారా అవి తమను ఆర్థికంగా నష్టపరుస్తున్నాయని పేర్కొన్నారు. ఈ మేరకు గుడ్‌ఫ్రైడే సందర్భంగా శుక్రవారం తన సొంత సోషల్‌ మీడియా వేదిక ‘ట్రూత్‌ సోషల్‌’లో ‘నాన్‌ టారిఫ్‌ చీటింగ్‌’ (సుంకాలు విధించకుండానే మోసం) పేరుతో 8 అంశాలను ప్రస్తావించారు. వాటిలో 1. కరెన్సీ మోసాలు 2. సుంకాల రూపంలో వసూలు చేసే వ్యాట్‌ ట్యాక్స్‌లు, సబ్సిడీల ఎగుమతులు 3. చవక సరుకులను తెచ్చి మార్కెట్లను ముంచెత్తటం 4. ప్రభుత్వ సబ్సిడీలు 5. విదేశీ ఉత్పత్తుల నుంచి ఆయా దేశాలు తమ వ్యవసాయోత్పత్తులకు రక్షణ కల్పించటం (యూరోపియన్‌ యూనియన్‌ దేశాల్లో జన్యుపరివర్తిత మొక్కజొన్నను అనుమతించపోవటం) 6. సాంకేతిక ప్రమాణాల పేరుతో విదేశీ ఉత్పత్తులను అడ్డుకోవటం (జపాన్‌ బౌలింగ్‌ టెస్ట్‌) 7. పైరసీ, మేధోహక్కుల చోరీ (ఏటా లక్ష కోట్ల డాలర్లకుపైగా) 8. సుంకాలను తప్పించుకోవటానికి సముద్రరవాణా మార్గాలను ఎంచుకోవటం వంటి అంశాలను ట్రంప్‌ పేర్కొన్నారు. అమెరికా నుంచి దిగుమతి అయ్యే కార్ల మీద జపాన్‌ నిర్వహించే పరీక్షను బౌలింగ్‌ బాల్‌ టెస్ట్‌గా ట్రంప్‌ అభివర్ణించారు. ‘బంతిని 20 అడుగుల ఎత్తు నుంచి కారు మీదకు వదులుతారు. కారుపై సొట్ట పడితే దానికి నాణ్యత లేదని పక్కనపెడతారు. ఎంత హాస్యాస్పదం ఇది’ అని ఎద్దేవా చేశారు.