Corruption: అవినీతి జాడ్యం వదిలేదెన్నడో

ఈ రోజుల్లో అవినీతి అనే మాట మనకు పత్రికల్లో, టీవీ వార్తల్లో, సోషల్ మీడియాలో ఎక్కడ చూసినా కనిపిస్తోంది, వినిపిస్తోంది. కానీ దురదృష్టమేమిటంటే, చాలామంది ప్రజలు దీన్ని పెద్ద సమస్యగా చూడటం లేదు! ‘ఇది మన సమాజంలో సాధారణమైన విషయం’ అని భావిస్తున్నారు. అవినీతి అంటే.. ‘ఎవరికైనా అప్పగించిన అధికారాన్ని లేదా బాధ్యతను తమ సొంత లాభం కోసం వాడుకోవడం.’ ఇది న్యాయం, సమానత్వం, విశ్వాసం వంటి విలువలను నాశనం చేస్తుంది. ఇది కేవలం డబ్బు తీసుకోవడం మాత్రమే కాదు, బంధుప్రీతి ఆధారంగా పనిచేయించడం లేదా నిబంధనలను తారుమారు చేయడం కూడా అవినీతికి ప్రతిరూపాలే. ఏదైనా వృత్తిలో అనైతికంగా వ్యవహరించడం కూడా ఒక రకమైన అవినీతే.

అవినీతి ఎన్నో రూపాల్లో ఉంటుంది. అందులో ముఖ్యమైనవి: లంచం– పని సులభంగా చేయించుకోవడానికి డబ్బు ఇవ్వడం; దుర్వినియోగం– ప్రభుత్వ నిధులను తమ వ్యక్తిగత పనులకు మళ్లించడం; మోసం– తప్పుడు బిల్లులు, తప్పుడు రికార్డులు చూపించి లాభం పొందడం; దోపిడీ– అధికారం వాడుకుని భయపెట్టి డబ్బు దోచుకోవడం; నెపోటిజం, క్రోనిజం– అర్హుల కంటే తమవారికి ఉద్యోగాలు, కాంట్రాక్టులు ఇవ్వడం; రాజకీయ అవినీతి– ప్రజా వనరులను పార్టీ ప్రయోజనాల కోసం వాడుకోవడం; స్పీడ్ మనీ– సాధారణ సేవలు త్వరగా చేయించుకోవడానికి ఇచ్చే చిన్న లంచాలు; స్టేట్ క్యాప్చర్– పెద్ద వ్యాపారులు, రాజకీయ నాయకులు కలిసి ప్రభుత్వ విధానాలను తమకు అనుకూలంగా మలచుకోవడం; ప్రొక్యూర్‌మెంట్ అవినీతి– టెండర్లు, కాంట్రాక్టులు తమవారికి ఇచ్చే విధంగా సర్దుబాటు చేయడం.

అవినీతి మూడు స్థాయిల్లో కనిపిస్తుంది: చిన్న అవినీతి (రోజువారీ లంచాలు), పెద్ద అవినీతి (కోట్ల రూపాయల మోసాలు), వ్యవస్థాగత అవినీతి (సమాజం మొత్తం అవినీతి పద్ధతిలో పనిచేయడం)! ఆంధ్రప్రదేశ్, తెలంగాణ రాష్ట్రాల్లో అవినీతి ఇప్పుడు ప్రజల చర్చలో ముఖ్యాంశం. చిన్న లంచాల నుంచి కోట్ల రూపాయల కుంభకోణాల వరకూ జరిగిన అవినీతితో రెండు రాష్ట్రాలూ అనేక రకాలుగా నష్టపోయాయి. ఆంధ్రప్రదేశ్‌లో రవాణా, రెవెన్యూ, రిజిస్ట్రేషన్ శాఖల్లో ‘స్పీడ్ మనీ’ సాధారణమైంది. ఏసీబీ తరచూ దాడులు చేస్తోంది, కానీ పెద్దగా మార్పు కనిపించడం లేదు. తెలంగాణలో ఇంజనీర్లు, మునిసిపల్ అధికారులు, రెవెన్యూ ఇన్‌స్పెక్టర్లు కోట్ల రూపాయల విలువైన అక్రమ ఆస్తులతో పట్టుబడుతున్నారు. కానీ కేసులు కోర్టుల్లో సంవత్సరాల తరబడి ఉండిపోతున్నాయి. శిక్షలు మాత్రం అరుదుగా పడుతున్నాయి.

ఇటీవల రెండు తెలుగు రాష్ట్రాల్లోనూ భారీగా అవినీతి కేసులు బయటపడ్డాయి. ఆంధ్రప్రదేశ్‌లో: గిరిజన సంక్షేమశాఖ ఇంజనీర్ కోట్ల రూపాయల లంచం తీసుకుంటూ పట్టుబడ్డాడు. అవేగాక– అసలు మద్యం, కల్తీ మద్యం, తిరుపతి వేంకటేశ్వరస్వామి లడ్డు ప్రసాదంలో వాడిన నెయ్యి... లాంటి ఎన్నో విషయాల్లో అవినీతి ఆరోపణలు, వివిధ దర్యాప్తులు వంటి వార్తలు రోజూ చదువుతూనే ఉన్నాం. తెలంగాణలో: గొర్రెల పంపిణీ పథకంలో, అలాగే కాళేశ్వరం ప్రాజెక్టుకు సంబంధించి కూడా అవినీతి ఆరోపణలు ఉన్నాయి. ఆ ప్రాజెక్టులో పనిచేసిన ఇద్దరు సీనియర్ ఇంజనీర్లు తమ ఆదాయానికి మించిన ఆస్తులు కలిగి ఉన్నారని ఏసీబీ కూడా తేల్చింది.

‘ఏసీబీ తరచుగా దాడులు చేసినా అవినీతి ఎందుకు తగ్గడం లేదు?’ దీనికి ప్రధాన కారణాలు అయిదు: రాజకీయ జోక్యం– ఏసీబీ స్వతంత్రంగా పనిచేయలేకపోవడం; చట్టపరమైన లోపాలు– నోటిఫికేషన్‌లు సరిగ్గా లేక కేసులు రద్దు కావడం; శిక్షణ లోపం– సాంకేతిక, ఆర్థిక విచారణలపై అవగాహన లేక ఆధారాలు బలహీనపడడం; పరస్పర మైత్రి– కాంట్రాక్టర్లు, అధికారులు, రాజకీయ నాయకులు కలిసి వ్యవస్థగా పనిచేయడం; టెక్నాలజీ దుర్వినియోగం– ‘సర్వర్ డౌన్’ అని చెబుతూ డిజిటల్ సేవల్లో కొత్త రకాల లంచాలు వసూలు చేయడం. ఇది కేవలం చట్టపరమైన లోపం మాత్రమే కాదు, రాజకీయ–ఆర్థిక వ్యవస్థలో లోపం కూడా. చిన్న లంచాలను కూడా సాధారణంగా చూడడం ఇప్పుడు సంస్కృతిలో భాగమైంది. ‘ఇలా లేకపోతే పని జరగదు’ అన్న భావన బలపడింది. అవినీతిని తగ్గించాలంటే మాటలతో కాదు, సంస్థాగత మార్పులు చేయడం అవసరం. అందుకు ముఖ్యంగా చేయాల్సినవి: ఏసీబీకి స్వతంత్రత– స్వతంత్ర బడ్జెట్, నియామకాలు; చట్టాన్ని బలపరచడం– అన్ని ఏసీబీ కార్యాలయాలను పోలీస్‌స్టేషన్‌లుగా ప్రకటించడం, ప్రత్యేక కోర్టుల ఏర్పాటు; ఆస్తుల వెల్లడి– ఉన్నతాధికారులు తమ ఆస్తుల వివరాలను వెల్లడించడం; పారదర్శక టెక్నాలజీ– ప్రాజెక్టు వివరాలు ఆన్‌లైన్‌లో ప్రజలకందుబాటులో ఉంచడం; దోచుకున్న ఆస్తుల స్వాధీనం– లంచం కేసుల్లో కేవలం అరెస్టులు కాకుండా ఆస్తులు తిరిగి ప్రభుత్వానికి ఇప్పించడం.

అవినీతి నిరోధక సంస్థలను రాజకీయ ప్రభావం నుంచి ప్రభుత్వం బయటకు తేవాలి. విజిల్ బ్లోవర్ల రక్షణ, ఆన్‌లైన్ ఫిర్యాదు వ్యవస్థలు, ఆర్టీఐ ద్వారా సమాచారం విడుదల తప్పనిసరిగా ఉండాలి. ప్రజలూ మారాలి. లంచాలు ఇవ్వకుండా అధికారులను నిలదీయాలి. డిజిటల్ రసీదులు తీసుకోవాలి. ఫిర్యాదు చేయడానికి భయపడకూడదు. మీడియా, సామాజిక సంస్థలు అవినీతి కేసులను బహిర్గతం చేయాలి. ప్రతి అవినీతి కేసూ సామాన్య ప్రజల విశ్వాసానికి గాయమే అని గుర్తుపెట్టుకోవాలి. ఏసీబీని రాజకీయ ఆయుధం కాకుండా ప్రజల రక్షకసంస్థగా మార్చడం ప్రభుత్వం చేతుల్లోనే ఉంది. చట్టం అందరికీ సమానంగా పనిచేసే రోజు వచ్చినప్పుడు మాత్రమే, అవినీతి జాడ్యం తగ్గుతుంది. ‘మితిమీరిన ప్రజాస్వామ్యం కూడా ఒక రకంగా ఈ అవినీతి మహమ్మారి వృద్ధికి దోహదం చేస్తున్నది’ అనే భావన కూడా ఉంది. మన దేశం, రాష్ట్రాల పురోభివృద్ధి గురించి సామాన్య ప్రజలు కంటున్న కలలు ఎండమావులు కాకూడదంటే అవినీతిని కూకటి వేళ్లతో పీకివేయాల్సిన అవసరం ఎంతైనా ఉంది.

ప్రొ. అప్పారావు పొదిలె

పూర్వ ఉపకులపతి, హైదరాబాద్ విశ్వవిద్యాలయం

ఇవి కూడా చదవండి..

అయోధ్యలో పర్యటించనున్న మోదీ.. రామాలయంపై పతాకావిష్కరణ

ఢిల్లీలో డీకే విధేయులు.. సీఎం మార్పుపై సిద్ధరామయ్య ఆసక్తికర వ్యాఖ్యలు

మరిన్ని జాతీయ వార్తలు కోసం క్లిక్ చేయండి.