పేదరికపు పరుగులో కుప్పకూలీ..

కానిస్టేబుల్‌ నియామక పరీక్షలో యవకుడు మృతి

మచిలీపట్నంలో పరుగు పందెం జరుగుతుండగా..

కార్డియాక్‌ అరెస్టుగా తేల్చిన వైద్యులు

మృతుడిది ఎ.కొండూరు మండలం జీళ్లకుంట

పేదరికంలో పుట్టి.. ప్రభుత్వ ఉద్యోగం కోసం సాధన

ఎ.కొండూరు, జనవరి 2 (ఆంధ్రజ్యోతి) : ఎ.కొండూరు మండలం జీళ్లకుంటకు చెందిన ధరావత చంద్రశేఖర్‌రావు (25)ది నిరుపేద కుటుంబం. ఏడేళ్ల కిందట తండ్రి దేవా మృతిచెందాడు. కుటుంబ భారమంతా తల్లి మణిపైనే పడింది. అయినా ఆమె వెనకడుగు వేయలేదు. కూలి పని చేసుకుంటూ కొడుకు చంద్రశేఖర్‌రావును డిగ్రీ వరకూ చదివించింది. కష్టపడి కూతురుకు పెళ్లి చేసింది. తల్లి కష్టాన్ని చూసి చలించిపోయిన చంద్రశేఖర్‌ ఎలాగైనా ఆమెకు చేదోడుగా ఉండాలనుకున్నాడు. ఎలాగైనా ప్రభుత్వ ఉద్యోగం సాధించి ఆమెను బాగా చూసుకోవాలనుకున్నాడు. ఇటీవల రాష్ట్ర ప్రభుత్వం పోలీసు కానిస్టేబుల్‌ నియామకం కోసం నోటిఫికేషన్‌ జారీ చేయడంతో దరఖాస్తు చేశాడు. గురువారం మచిలీపట్నంలో జరుగుతున్న దేహదారుఢ్య పరీక్షలకు హాజరయ్యాడు. 1,600 మీటర్ల పరుగు పందెంలో కొంతదూరం పరుగు తీసిన చంద్రశేఖర్‌ ఒక్కసారిగా కుప్పకూలిపోయాడు. అక్కడే ఉన్న వైద్యసిబ్బంది యువకుడిని హుటాహుటిన అంబులెన్స్‌లో మచిలీపట్నం సర్వజన ఆసుపత్రికి తరలించారు. అక్కడ చికిత్స పొందుతూ కార్డియాక్‌ అరెస్ట్‌ కారణంగా మరణించినట్టు వైద్యులు ధ్రువీకరించారు. చంద్రశేఖర్‌ డబ్ల్యూపీసీ కౌంట్‌ 30 వేలకు చేరిందని, దీంతో పాటు ఐదు రోజులుగా తీవ్రజ్వరంతో బాధపడుతున్నాడని వైద్యులు తెలిపారు. ఉద్యోగం సాధించి ఇంటికి వస్తాడనుకున్న కుమారుడు మృత్యురూపంతో రావడంతో ఆ కుటుంబం కన్నీటిలో మునిగిపోయిది. చేతికి అంది వచ్చిన కొడుకు కుటుంబ మృతి చెందడంతో తల్లి మణి రోదన ప్రతి ఒక్కరినీ కంటతడి పెట్టించింది.