Charge Sheet Filed: పులివర్తి నానిపై హత్యాయత్నం కేసులో చార్జిషీట్‌

• తిరుపతి కోర్టులో దాఖలు చేసిన పోలీసులు

• ఏ1 భానుకుమార్‌ రెడ్డి.. ఏ37 చెవిరెడ్డి మోహిత్‌ రెడ్డి

తిరుపతి(నేరవిభాగం), జూన్‌ 23(ఆంధ్రజ్యోతి): చంద్రగిరి టీడీపీ అభ్యర్థి పులివర్తి నానిపై హత్యాయత్నం కేసులో పోలీసులు సోమవారం తిరుపతి మొదటి అదనపు జిల్లా న్యాయమూర్తి కోర్టులో చార్జిషీటు దాఖలు చేశారు. ఈ కేసులో మొదటి నిందితుడిగా రామచంద్రపురం జడ్పీటీసీ సభ్యురాలు డిల్లీరాణి భర్త, వైసీపీ నాయకుడు భానుకుమార్‌రెడ్డిని, ఏ37గా వైసీపీ నేత చెవిరెడ్డి మోహిత్‌ రెడ్డి పేరును నమోదు చేశారు. మరో ప్రధాన నిందితుడు, నడవలూరు సర్పంచి గణపతి రెడ్డిని కూడా ఈ కేసులో పోలీసులు అరెస్టు చేశారు.

గతేడాది మే 14న మధ్యాహ్నం 3.22 గంటల ప్రాంతంలో మహిళా విశ్వవిద్యాలయంలోని స్ట్రాంగ్‌ రూముల నుంచి వెనుదిరిగి వస్తున్న పులివర్తి నానీ వాహనాలపై వైసీపీ వర్గీయులు బీరు బాటిళ్లు, కర్రలు, ఇనుప రాడ్లు, సుత్తులతో దాడి చేశారు. వాహనాలను ధ్వంసం చేశారు. నానినీ గాయపరిచారు. నాని గన్‌మ్యాన్‌ ధరణి కూడా తీవ్రంగా గాయపడ్డారు. ఘటనపై కేసు నమోదు చేసిన పోలీసులు వెంటనే దాదాపు 14 మందిని అదుపులోకి తీసుకున్నారు. అన్ని కోణాల్లో విచారించి 37 మందిని నిందితులుగా గుర్తించారు. వీరిపై 307 సెక్షన్‌ కింద హత్యాయత్నం కేసు నమోదు చేశారు. వీరిలో నలుగురు ముందస్తు బెయిల్‌ తీసుకోవడంతో 33 మందిని అరెస్టు చేశారు. దాదాపు 13 నెలల పాటు విచారణ చేసి సోమవారం చార్జిషీటు దాఖలు చేశారు.