Nandyal Crime News: ఏపీఎస్పీ కానిస్టేబుల్‌ హత్య

• ఓ మహిళతో వివాహేతర సంబంధం

• ఆమె కుమార్తెతో అసభ్య ప్రవర్తన

• తీవ్రంగా గొడవపడ్డ యువతి స్నేహితుడు

• తర్వాత పక్కా ప్లాన్‌తో హతమార్చిన వైనం

నంద్యాల, ఏప్రిల్‌ 18(ఆంధ్రజ్యోతి): వివాహేతర సంబంధం నంద్యాలలో ఓ ఏపీఎస్పీ కానిస్టేబుల్‌ హత్యకు దారితీసింది. పోలీసులు తెలిపిన వివరాల మేరకు.. నంద్యాల జిల్లా ఆళ్లగడ్డ మండలం పెద్ద కందుకూరు గ్రామానికి చెందిన ఫరూక్‌(33) మంగళగిరి ఆక్టోపస్‌లో కానిస్టేబుల్‌గా పనిచేస్తున్నారు. భార్య, పిల్లలతో మంగళగిరిలో నివాసం ఉంటున్నారు. ఆయన స్వగ్రామంలోని ఓ మహిళతో వివాహేతర సంబంధం కొనసాగిస్తున్నట్లు సమాచారం. సదరు మహిళను భర్త వదిలేయడంతో తన కుమార్తెతో కలిసి నంద్యాల శివారు నందమూరినగర్‌లో నివాసం ఉంటోంది. ఫరూక్‌ స్వగ్రామంలో పని ఉందని భార్యకు చెప్పి, 4రోజుల సెలవు తీసుకుని ఈ నెల 8న మంగళగిరి నుంచి వచ్చాడు. స్వగ్రామానికి వెళ్లకుండా ఆ మహిళ ఇంటికి వచ్చాడు. అక్కడ ఆమె కుమార్తె పట్ల అసభ్యంగా ప్రవర్తించడంతో వాగ్వాదం జరిగినట్లు తెలిసింది. కుమార్తె స్నేహితుడు ఫరూక్‌తో గొడవ పడ్డాడు. ఈ నెల 9న మాట్లాడుదామని.. ఆ యువకుడు ఫరూక్‌ను పిలిచాడు. ఫరూక్‌ను తన వాహనంలో ఎక్కించుకుని ఆళ్లగడ్డ నియోజకవర్గం చాగలమర్రి మండల సమీపంలోకి తీసుకెళ్లాడు. పథకం ప్రకారం యువతి స్నేహితులు నలుగురు అక్కడకు వచ్చి కానిస్టేబుల్‌ను హతమార్చి నంద్యాల-గిద్దలూరు అటవీ ప్రాంతంలోని ఓ వంతెన కింద పడేసి పరారయ్యారు. మృతుడి భార్య ఫిర్యాదుతో పోలీసులు దర్యాప్తు చేపట్టారు. ఫరూక్‌ హత్యకు గురైనట్లు గుర్తించారు. మృతదేహాన్ని పోస్టుమార్టం నిమిత్తం నంద్యాల ప్రభుత్వాసుపత్రికి తరలించారు. హత్యకు పాల్పడిన వారితో పాటు మహిళను కూడా అదుపులోకి తీసుకున్నట్లు సమాచారం.