నకిలీ విత్తనాలు, ఎరువులు అమ్మితే కఠిన చర్యలు

జిల్లాలో ఎరువులు విత్తనాల కొరత లేదు

వ్యవసాయశాఖ జాయింట్‌ డైరెక్టర్‌ గీతా రెడ్డి

యాచారం, జూన్‌ 7 : నకిలీ ఎరువులు, విత్తనాలు అమ్మినా.. లూజుగా విక్రయించినా కఠిన చర్యలు తీసుకుంటామని, జిల్లాలో ఎరువులు, విత్తనాల కొరత లేదని జిల్లా వ్యవసాయశాఖ జాయింట్‌ డైరెక్టర్‌ గీతారెడ్డి చెప్పారు. శుక్రవారం ఆమె యాచారం మండల కేంద్రంలోని ఎరువుల దుకాణాలను తనిఖీ చేశారు. ఎ రువులు విత్తనాలు లూజుగా విక్రయిస్తే చర్యలు తీసుకుంటామన్నారు. విత్తనాలు కొన్న రైతులు రసీదులు తీసుకోవాలని, వాటిని పంట చేతికందే వరకు భద్రపరచుకోవాలని సూచించారు. వ్యవసాయశాఖ అనుమతి లేకుండా ఎరువులు, విత్తనాలు విక్రయిస్తే చట్టపరంగా కఠిన చర్యలు తీసుకుంటామని హెచ్చరించారు. ఎ రువులను కృత్రిమ కొరత సృష్టించినా చర్యలు తీసుకుంటామని చెప్పారు. కాలం చెల్లిన విత్తనాలు అమ్మరాదని కోరారు. పదిమందికి అన్నం పెడుతున్న రైతుకు అన్యాయం చేయరాదని వ్యాపారులకు సూచించారు. ఖరీఫ్‌ సీజన్‌ ముగిసేదాకా ప్రతీ మండలంలోని ఎ రువులు, విత్తనాల దుకాణాలను వ్యవసాయాధికారులు తనిఖీ చేయాలని ఆదేశించినట్లు ఆమె తెలిపారు.