Viral: రోజూ ఇంటికొచ్చే జింకకు పోనీలే అని ఆహారం పెట్టాడు! ఓ రోజు సడెన్‌గా అది చేసిన పనికి..

ఇంటర్నెట్ డెస్క్: మూగ జీవాల పట్ల కాస్తంత కరుణ చూపిస్తే అవి ఎలాంటి సర్‌ప్రైజ్‌లు ఇస్తాయో చెప్పే ఘటన ఇది. ప్రస్తుతం ఈ ఉదంతం నెట్టింట వైరల్‌గా మారింది. వీడియోలో కనిపించిన దాని ప్రకారం, ఓ వ్యక్తి ఇంటి ముందు ఓ రోజు జింక వచ్చి ఆగింది. ఏందుకో ఏమో గానీ అది అతడిని చూసిన తరువాత కూడా పారిపోలేదు. దీంతో, ఆ వ్యక్తికి కూడా దాని ప్రవర్తన వింతగా అనిపించింది. జింకలాంటి సాధు జంతువుతో వచ్చే ప్రమాదమేమీ లేదు కాబట్టి దానికి ఆ రోజు తన వద్ద ఉన్న ఏవో గింజలు తినిపించాడు. అవి తిన్నాక ఆ జింక తన దారిన తాను వెళ్లిపోయింది.

జింక ఇక మళ్లీ రాదనుకున్న అతడికి మరుసటి రోజే మరో సర్‌ప్రైజ్ ఇచ్చిందా మూగ జీవి. అతడిని వెతుక్కుంటూ వచ్చి అది అతడి డోర్ వద్దే ఓపిగ్గా ఎదురు చూసింది. ఏదో కారణంతో తలుపు తీసిన అతడికి ఇంటి ముందు జింక కనిపించడంతో ఆశ్చర్యపోయాడు. అంతకుముందు రోజు వచ్చిన జింకే మళ్లి వచ్చిందని తెలిసి ఉబ్బితబ్బిబ్బైపోయాడు. తన వద్ద ఉన్న వాటిని మళ్లీ దానికి పెట్టాడు. ఇక అక్కడి నుంచీ ఇద్దరి మధ్యా స్నేహం మొదలైంది (Deer surprises man who feeds it everyday).

ప్రతి రోజూ వచ్చే జింకకు అతడు ఆహారం పెడుతూనే ఉన్నాడు. అది తిని వెళ్లిపోతుండేది. అతడంటే దానికి భయమే లేకుండా పోయింది. ఇంట్లోకే నేరుగా వచ్చేసేది. జింక మచ్చికైనందుకు అతడూ సంతోషించాడు. దానికి ఫుడ్ పెడుతూ ఆ దృశ్యాల్ని జాగ్రత్తగా వీడియో తీసి తీపి గుర్తులుగా భద్రపరుచుకున్నాడు. అలాంటి టైంలో ఓ రోజు జింక ఊహించని షాకిచ్చింది. రోజూ ఒంటరిగా వచ్చే జింక ఆ రోజు మాత్రం తన తోటి జింకలన్నిటినీ వెంటబెట్టుకుని వచ్చేసింది. తలుపు ఎదురుగా ఒకేసారి అన్ని జింకలను చూసిన అతడు కూడా సంబరపడిపోయాడు. ఇంటికి ఫ్రెండ్స్ వచ్చారని మురిసిపోతూ వాటన్నిటికీ ఆహారం పెట్టడం ప్రారంభించాడు. ఇదంతా వీడియో తీసి నెట్టింట పెట్టడంతో ఈ ఘటన వైరల్‌గా (Viral Video) మారింది. స్నేహానికి అడ్డుగోడలంటూ ఉండవని అనేక మంది కామెంట్ చేశారు. మరి నెట్టింట వైరల్ అవుతున్న ఈ ఇంటరెస్టింగ్ వీడియోను మీరో ఓమారు చూడండి.