బాంబు పేలుళ్ల కేసులో కరీం తుండా నిర్దోషి

జైపూర్‌, ఫిబ్రవరి 29: వరుస బాంబు పేలుళ్ల కేసులో దావూద్‌ ఇబ్రహీం అనుచరుడు అబ్దుల్‌ కరీం తుండా (81) నిర్దోషి అని గురువారం అజ్మీర్‌లోని టాడా కేసుల ప్రత్యేక కోర్టు తీర్పు చెప్పింది. బాబ్రీ మసీదు కూల్చివేతకు ఏడాదయిన సందర్భాన్ని పురస్కరించుకొని 1993 డిసెంబరు 5, 6 తేదీల అర్ధరాత్రి అయిదు చోట్ల వరుస బాంబు పేలుళ్లు చోటు చేసుకున్నాయి. హైదరాబాద్‌, లఖ్‌నవూ, కాన్పూర్‌, సూరత్‌, ముంబయిల్లోని అయిదు రైళ్లలో ఆ బాంబులు పెట్టారు. ఈ ఘటనలో ఇద్దరు మరణించగా, పలువురు గాయపడ్డారు. పోలీసులు తుండాతో పాటు ఇర్ఫాన్‌ అలియాస్‌ పప్పు, హమీదుద్దీన్‌లపై కేసులు పెట్టారు. తుండాకు వ్యతిరేకంగా ఎలాంటి రుజువులు చూపట్టలేకపోవడంతో ఆయనను విడుదల చేస్తున్నట్టు జడ్జి తెలిపారు. మిగిలిన ఇద్దరికి యావజ్జీవ కారాగార శిక్ష విధించారు.