మాల్దీవులకు చైనా ఉచిత సైనిక సాయం
ABN , Publish Date - Mar 06 , 2024 | 03:33 AM
భారత్‌తో దౌత్యపరమైన వివాదాలను పెంచుకుంటున్న మాల్దీవుల్లో పాగాకు చైనా సిద్ధమైంది.
మాలె, మార్చి 5: భారత్‌తో దౌత్యపరమైన వివాదాలను పెంచుకుంటున్న మాల్దీవుల్లో పాగాకు చైనా సిద్ధమైంది. ఈ క్రమంలో ఎలాంటి ప్రతిఫలాన్ని ఆశించకుండా.. మాల్దీవులకు సైనిక సహకారం అందించేందుకు ముందుకొచ్చింది. దీనిపై ఇరు దేశాలు ఒప్పందం కుదుర్చుకున్నట్లు మాల్దీవుల రక్షణ శాఖ మంగళవారం వెల్లడించింది. సోమవారం మాల్దీవుల రక్షణ మంత్రి మహమ్మద్‌ ఘాసన్‌, చైనా మేజర్‌ జనరల్‌ జాంగ్‌ బావోకున్‌ ఈ ఒప్పందంపై సంతకాలు చేసినట్లు చెబుతూ.. చైనా ఉచితంగా సైనిక సహకారం అందజేస్తున్నట్లు వివరించింది. హిందూ మహాసముద్రంలో పాగాకు చైనా చేస్తున్న యత్నాలను అడ్డుకుంటున్న భారత్‌కు ఇది ఒకింత ఇబ్బందికరమైన పరిణామమే..! ఇప్పటికే శ్రీలంకకు చైనా దగ్గరైంది.
