వృద్ధురాలికి చేయూత

తనకల్లు, మారి, 28: మండలంలోని దేవలంతండా సమీపంలో రోడ్డు పక్కన ఓ అనాథ వృద్ధురాలిని ఎవరో నాలుగు రోజులక్రితం వదలి వెళ్లారు. అప్పటి నుంచి ఆమె రోడ్డు పక్కనే ఉండిపోయింది. ఈ విషయాన్ని పక్కనే ఉన్న మామిడి తోట యజమానికి ము నీర్‌ 100కు కాల్‌ చేసి సమాచారం అందించారు. అయినా ఎవరూ స్పందించలేదు. గురువారం కోటపల్లి గ్రామ సచివాలయ అగ్రికల్చర్‌ అసిస్టెంట్‌ రంజిత కొక్కంటి క్రాస్‌లోఉన్న వందేమాతరం టీమ్‌కు సమాచారం అందించారు. టీమ్‌ సభ్యులు అశోక్‌, గజేంద్ర, శ్రీనివాసులు తదితరులు వృద్ధురాలి వద్దకు చేరుకుని అమడగూరు మండలంలోని శ్రీమాతృశ్రీ వృద్ధాశ్రమానికి తరలించడానికి ఆశ్రమ నిర్వాహకురాలు అరుణజ్యోతితో సంప్రదించారు. నిర్వాహకురాలు వెంటనే చేరుకుని వృద్ధురాలికి వందేమాతరం టీమ్‌ సభ్యులతో కలిసి జుట్టు కత్తిరించి, స్నానం చేయించి ఆస్పత్రికి తరలించారు. తర్వాత విషయాన్ని తహసీల్దార్‌ శోభాసువర్ణమ్మకు తెలిపారు. స్పందించిన తహసీల్దార్‌ ఐసీడీఎస్‌ అధికారుల దృష్టికి తీసుకెళ్లారు.