త్రీడీలో చిక్కిన వాసన అణువు పనితీరు గుట్టు!

న్యూఢిల్లీ, మార్చి 18: మనిషికి ఉండే పంచేంద్రియ జ్ఞానంలో వాసన శక్తి కూడా ఒకటి. మిగిలిన ఇంద్రియ జ్ఞానం గురించి పరిశోధకులకు కొంతమేర అవగాహన ఉన్నా.. వాసనను శరీరంలోని రిసెప్టెర్లు ఎలా గ్రహిస్తాయన్నదానిపై స్పష్టత లేదు. అయితే.. అమెరికాలోని కాలిఫోర్నియా వర్సిటీ పరిశోధకులు ఈ దిశగా ఓ కీలక మైలురాయిని చేరుకున్నారు. మనలోని వాసన గ్రాహాకాల్ని వాసన అణువు క్రియాశీలం చేసే ఘట్టాన్ని త్రీడీలో చిత్రించగలిగారు. ‘‘ఒక వాసనను మనం పసిగట్టేందుకు శరీరంలోని 400 రిసెప్టర్లు పనిచేస్తాయి. మనం గుర్తించే లక్షలాది వాసనల్లో ప్రతి ఒక్కటీ వివిధ వాసన అణువుల సమ్మేళనం. పియానోపై ఒక కీ నొక్కగానే ఒక స్వరం పలికినట్లుగా, ఒక్కో వాసనకు ఒక్కోలా రిసెప్టర్లు స్పందిస్తాయి. మా అధ్యయనంలో భాగంగా.. ఓఆర్‌51ఈ2 అనే రిసెప్టర్‌ను ఎంచుకున్నాం. సాంకేతికంగా పలు అడ్డంకుల్ని దాటి ఈ రిసెప్టర్‌ను బంధించగలిగాం. ఈ క్రమంలో వాసనను మానవ శరీరంలోని రిసెప్టర్‌ గుర్తించే చర్యను తొలిసారిగా గమనించాం’’ అని పరిశోధకులు తెలిపారు.