బైడెన్‌కు చర్మ క్యాన్సర్‌.. గత నెలలో శస్త్రచికిత్స

వాషింగ్టన్‌, మార్చి 4: అమెరికా అధ్యక్షుడు బైడెన్‌ (80)కు క్యాన్సర్‌ శస్త్రచికిత్స జరిగింది. ఆయన ఛాతీపై గాయం రూపంలో ఉన్న వ్యాధి కణజాలాన్ని వైద్యులు తొలగించారు. బైడెన్‌కు ఫిబ్రవరి మూడో వారంలో శస్త్రచికిత్స చేసినట్లు తెలుస్తోంది. గత నెల 16వ తేదీన ఆయనకు సాధారణ వైద్య పరీక్షలు నిర్వహించారు. అప్పట్లో.. అధ్యక్షుడికి ఏ ఆరోగ్య సమస్య లేదని వైద్యులు ప్రకటించారు. కానీ, ఆ తర్వాత బైడెన్‌ ఛాతీ చర్యంపై క్యాన్సర్‌ కణితిని గుర్తించారు. దీనికి ఇతర శరీర భాగాలకు వ్యాపించే లక్షణం లేనప్పటికీ.. జాగ్రత్తల్లో భాగంగా తొలగించారు. అయితే, ఇకపై మాత్రం ఎలాంటి చికిత్స అవసరం లేదని అధ్యక్ష భవనం వైట్‌హౌస్‌ వైద్యుడు డాక్టర్‌ కెవిన్‌ ఒకానర్‌ నివేదించారు. బైడెన్‌కు సోకింది బేసల్‌ సెల్‌ క్యాన్సర్‌ (బీసీసీ)గా వైద్యులు పేర్కొన్నారు. ఇది చర్మ ఉపరితలానికే పరిమితమయ్యే క్యాన్సర్‌. కాగా, బేసల్‌ సెల్స్‌.. కొత్త చర్మ కణాలను ఉత్పత్తి చేసి, మృత కణాలను చర్మంపైకి పంపుతాయి.