సిద్దరామయ్య జీవిత చరిత్రతో సినిమా

‘లీడర్‌ రామయ్య’ పోస్టర్‌ విడుదల

బెంగళూరు, మార్చి 30 (ఆంధ్రజ్యోతి): కర్ణాటక అసెంబ్లీలో ప్రతిపక్ష నేత సిద్దరామయ్య జీవితం ఆధారంగా ‘లీడర్‌ రామయ్య’ అనే సినిమా నిర్మితమవుతోంది. ఆయన పాత్రలో ప్రముఖ తమిళ నటుడు విజయ్‌ సేతుపతి నటిస్తున్నారు. హయాత్‌ఫీర్‌ నిర్మిస్తున్న ఈ చిత్రానికి దర్శకుడు సత్యరత్నం. శ్రీరామనవమి సందర్భంగా గురువారం సిద్దూ నివాసంలో ఆయన అభిమానం సంఘం నాయకులు సినిమా పోస్టర్లను విడుదల చేశారు. ఇందులో లవ్‌ స్టోరీ కూడా ఉందని, కన్నడతో పాటు తెలుగు, తమిళ, మళయాళం, హిందీ భాషల్లో నిర్మిస్తున్నామని సత్యరత్నం తెలిపారు. ఆగస్టు 3న సిద్దరామయ్య జన్మదినం సందర్భంగా విడుదల చేస్తామని, రెండు భాగాలుగా సినిమా నిర్మిస్తామని చెప్పారు. సుమారు రూ.30 కోట్లు ఖర్చవుతుందన్నారు. సిద్దరామయ్య బాల్యం, జీవనం, రాజకీయం ఆధారంగా కథ రూపొందించామని.. సాధ్యమైనంత త్వరగా షూటింగ్‌ పూర్తి చేస్తామని తెలిపారు.