జిల్లా వార్షిక రుణ ప్రణాళిక లక్ష్యం రూ.15,848 కోట్లు

కలెక్టర్‌ గౌతమి

అనంతపురం క్లాక్‌టవర్‌, జూన 6: జిల్లా వార్షిక రుణప్రణాళిక లక్ష్యం రూ.15,848 కోట్లుగా నిర్ణయించామని కలెక్టర్‌ గౌతమి ప్రకటించారు. జెడ్పీ ఆవరణంలోని డీపీఆర్‌సీ హాల్‌లో ఎల్‌డీఎం సత్యరాజ్‌ అధ్యక్షతన మంగళవారం డీసీసీ, డీఎల్‌ఆర్‌సీ సమావేశం నిర్వహించారు. చైర్మన హోదాలో కలెక్టర్‌ గౌతమి వార్షిక ప్రణాళికను ఆవిష్కరించారు. ఈ ఏడాది ఖరీఫ్‌, రబీ పంట రుణాలతో పాటు అన్ని వర్గాలు, అన్ని రంగాలకు రూ.15,848 కోట్ల రుణాలు ఇవ్వాలని లక్ష్యంగా పెట్టుకున్నామని కలెక్టర్‌ తెలిపారు. ఇందులో పంట రుణాల కింద రూ.7,742 కోట్లు, వ్యవసాయ అనుబంధ రంగాలకు రూ.3,310 కోట్లు, పరిశ్రమలు-సేవా రంగానికి రూ.1,962 కోట్లు కేటాయించారు. గృహ రుణాలకు రూ.280 కోట్లు కేటాయించారు. ఈ ఏడాది వ్యవసాయేతర రంగాలకు రూ.2,188 కోట్లు ఇవ్వాలని లక్ష్యాన్ని నిర్దేశించామని కలెక్టర్‌ తెలిపారు. కార్యక్రమంలో నాబార్డు డీడీఎం అనూరాధ, ఎస్‌బీఐ ఆర్‌ఎం రమేష్‌, కెనరాబ్యాంకు ఆర్‌ఎం రాంప్రసాద్‌రెడ్డి, డీఆర్‌డీఏ పీడీ నరసింహారెడ్డి, వివిధ శాఖల జిల్లా అధికారులు పాల్గొన్నారు.