Britain PM: బ్రిటన్ ప్రధానిగా మనోడే... చరిత్ర సృష్టించిన రుషి సునాక్... సంబరాల్లో భారతీయులు...
ABN , First Publish Date - 2022-10-24T18:52:45+05:30 IST
బ్రిటన్ ప్రధాన మంత్రి పదవికి రుషి సునాక్ ఎన్నికయ్యేందుకు మార్గం సుగమం అయింది.
లండన్ : బ్రిటన్ ప్రధాన మంత్రి పదవికి రుషి సునాక్ ఎన్నికయ్యేందుకు మార్గం సుగమం అయింది. ఆయనకు పోటీదారుగా నిలిచిన పెన్నీ మోర్డాంట్ తన అభ్యర్థిత్వాన్ని ఉపసంహరించుకున్నారు. భారత సంతతికి చెందిన రుషి సునాక్ బ్రిటన్కు అత్యంత పిన్న వయస్కుడైన ప్రధాన మంత్రి కాబోతున్నారు. ఆయన మొదట భారతీయ మూలాలుగల బ్రిటన్ ప్రధాని అవుతారు.
రుషి సునాక్ సెప్టెంబరులో జరిగిన ఎన్నికల్లో లిజ్ ట్రస్ చేతిలో పరాజయం పాలైన సంగతి తెలిసిందే. ఆమె అనేక యూ-టర్న్లు తీసుకుని విమర్శలపాలై, చివరికి రాజీనామా చేశారు. దీంతో రవి అస్తమించని సామ్రాజ్యంగా పేరు పొందిన బ్రిటన్కు అత్యంత క్లిష్ట పరిస్థితుల్లో నాయకత్వం వహించేందుకు రుషి సునాక్ ముందుకొచ్చారు.
కాగా తీవ్ర సంక్షోభంలో కూరుకుపోయిన బ్రిటన్ ఆర్థిక వ్యవస్థను పట్టాలెక్కిస్తానని, కన్వర్వేటివ్ పార్టీకి నాయకత్వం వహించేందుకు రిషి సునాక్ విశ్వాసంతో ఉన్నారు. గతంలో తాను ఎంతో కష్టపడ్డానని, కోవిడ్ సమయంలో అత్యంత కీలకంగా వ్యవహరించానని చెబుతున్నారు. తన సేవలను గుర్తించి అవకాశం ఇవ్వాలని కన్జర్వేటివ్ సభ్యులను ఆయన కోరిన విషయం తెలిసిందే.
ఇంగ్లాండ్ సౌతాంఫ్టన్లో జన్మించిన సునాక్ ప్రస్తుత వయసు 42 సంవత్సరాలు. ఆయన తల్లిదండ్రులు తూర్పు ఆఫ్రికా నుంచి ఇంగ్లాండ్కు వలస వెళ్లారు. తండ్రి యశ్వీర్, తల్లి ఉషా సునాక్. తండ్రి కెన్యాలో పుట్టి పెరిగారు. తల్లి టాంజానియాలో పుట్టి పెరిగారు. ఆమె పూర్వీకులు పంజాబ్ ప్రావిన్స్కు చెందినవారు. కెన్యా రిషి సునాక్ వించెస్టర్ కాలేజీలో చదువుకున్నారు. ఆక్స్ఫర్డ్, లింకన్ కాలేజీలో ఫిలాసఫీ, పాలిటిక్స్, ఎకానమిక్స్ చదివారు. స్టాన్ఫోర్డ్ యూనివర్సిటీ నుంచి ఆయన ఎంబీఏ చేశారు. 2009లో రిషి సునాక్ ఇన్ఫోసిస్ వ్యవస్థాపకుడు నారాయణ మూర్తి కుమార్తె అక్షితామూర్తిని వివాహమాడారు. వీరికి ఇద్దరు సంతానం. కృష్ణా సునాక్, అనౌష్కా సునాక్.
