సీతమ్మధార హైస్కూల్‌ హెచ్‌ఎం సస్పెన్షన్‌

విశాఖపట్నం, డిసెంబరు 6 (ఆంధ్రజ్యోతి): నాడు-నేడు పనుల్లో నిర్లక్ష్యం, పాఠశాల నిర్వహణలో వైఫల్యం అభియోగాలపై నగరంలోని సీతమ్మధార నెహ్రూ మునిసిపల్‌ ఉన్నత పాఠశాల ప్రధానోపాధ్యాయుడు రామ్‌ప్రసాద్‌ను జిల్లా విద్యాశాఖాధికారి ఎల్‌.చంద్రకళ సస్పెండ్‌ చేశారు. పాఠశాలలో పనిచేస్తున్న మరో నలుగురు ఉపాధ్యాయులకు షోకాజ్‌ జారీచేశారు. మరికొంతమంది టీచర్ల నుంచి వివరణ కోరారు. జగనన్న విద్యా కానుక కింద ప్రభుత్వం ఇచ్చే కిట్లలో బూట్లు ఇంకా కొంతమంది విద్యార్థులకు అందజేయలేదు. అలాగే నాడు-నేడు పనులకు సంబంధించి నిర్లక్ష్యం, పాఠశాల ఆవరణ, మరుగుదొడ్లు నిర్వహణలో వైఫల్యం చెందారనే కారణంతో హెచ్‌ఎంపై సస్పెన్షన్‌ వేటు వేశారు. ఇంకా తరగతుల నిర్వహణలో నిర్లక్ష్యం వహించారన్న ఆరోపణలపై టీచర్లకు షోకాజ్‌ ఇచ్చిన డీఈవో మరికొందరి నుంచి వివరణ కోరారు.