జల.. జల.. జలపాతం..!

కొండల్లోంచి జలపాతాల పరవళ్లు

ప్రకృతి అందాలతో అలరిస్తున్న ధారపల్లి, ఎరకంపాలెం, తోటపల్లి

కాకినాడ జిల్లాలోనే కనుల విందుగా పర్యాటక అందాలు

పోటెత్తుతున్న పర్యాటకులు

ప్రత్తిపాడు, డిసెంబరు 18:

ఎతైన కొండలు, చుట్టూ అడవి.. చల్లటి వాతావరణం.. కొండ కోనల్లోంచి జాలువారే జలపాతాల పరవళ్లు. ఈ ప్రదేశాలు ఎక్కడో ఊటీ, కొడైకెనాల్‌, లంబసింగి, అరకులోయల్లో ఉన్నాయనుకుంటున్నారా.. ఈ ప్రదేశాలు కాకినాడ జిల్లాలో ఉన్నాయంటే నమ్ముతారా. నమ్మితీరాలి. ప్రత్యక్షంగా చూసి ఆ అందాలను ప్రకృతి ప్రేమికులను మైమరిపించే ప్రదేశాలు ఎక్కడో కాదు. ప్రత్తిపాడు మండలంలో దర్శనమిస్తాయి. మూడుచోట్ల ఉన్న ఈ జలపాతాల అందాలను వీక్షించేందుకు వాటిలో జలక్రీడలు ఆడేందుకు ఎక్కడెక్క డ నుంచో సందర్శకులు తరలివస్తున్నారు. ఇటీవల కార్తీకమాసం లో పర్యాటకులు, సందర్శకులతో పోటెత్తారు. వాటి వివరాలివి.

మైమరిపించే ధారపల్లి..

ప్రత్తిపాడు మండలంలో పెద్దిపాలెం గ్రామానికి ఆరు కిలోమీటర్ల దూరంలో ధారపల్లి జలపాతం ఉంది. ప్రత్తిపా డు మండల కేంద్రానికి ఈ జలపాతం 25 కిలోమీటర్లు ఉం టుంది. బురదకోట కొండల్లోంచి ఈ జలపాతం ప్రవహిస్తూ ధారపల్లివద్ద ఎత్తయిన కొండలనుంచి జాలువారుతుంది. ఈ జాలువారే ప్రదేశంవద్ద జలక్రీడలు ఆడేందుకు సందర్శకులు, పర్యాటకులు ఎంతో ఉత్సాహం కనబరుస్తారు. మండు వేసవిలోను కూడా ఈ జలపాతం ప్రవహిస్తూ ఉంటుంది. ఇటీ వల కార్తీకమాసంలో ఈ జలపాతం ఉమ్మడి తూర్పుగోదావరి జిల్లా నలుమూలలనుంచి సందర్శకులు తరలివచ్చారు. ఇక్కడి కొండల మాటున సందర్శకులకోసం చిన్నపాటి కుటీరాలు మాదిరిగా దేవతామూర్తుల విగ్రహాలను ఏర్పాటు చేశారు. ఈ ప్రదేశంలో స్నానాలు ఆచరించి ఇష్టదేవతలను పూజిస్తూ పర్యాటకులు ప్రకృతి ఒడిలో సేదతీరుతున్నారు.

ఎరకంపాలెం చూడాలంటే కొండలెక్కాల్సిందే

మండలంలోని గోకవరం గ్రామానికి ఐదు కిలోమీటర్ల దూ రంలో ఎరకం పాలెం కొండపై ఈ జలపాతం ప్రవహిస్తోంది. ఈ జలపాతం చేరుకోవాలంటే భూమట్టం నుంచి 500 మీట ర్లు పైబడి కొండమార్గంలో నడిచి చేరుకోవాలి. దట్టమైన రిజర్వ్‌ ఫారెస్ట్‌ ఏరియాలో ఉన్న ఎరకంపాలెం కొండ వద్ద విపరీతమైన చలి వాతావరణం ఉంటుంది. మండు వేసవిలో కూడా ఈ జలపాతంవద్ద చల్లటి వాతావరణం ఉండడంతో ఏడాది పొడవునా ఈ జలపాతాన్ని సందర్శించేందుకు తెలుగు రా ష్ట్రాల నలుమూలలనుంచి పర్యాటకు లు తరలివస్తున్నారు. ఈ జలపాతం శి వలింగం అభిషేకిస్తూ కిందకు రావడం తో శివరాధనలను ఆకర్షిస్తోంది. కొండ దిగువన కింద బేసిక ఆశ్రమం, ధారా మల్లికార్జున దేవాలయాలు, పూలవనాలు ఉండడంతో ఈ ప్రదేశం పర్యాటక కేంద్రంగా అభివృద్ధి చెందుతోంది.

ధారల్లా జలపాతాలతో తోటపల్లి విశిష్టత

ప్రత్తిపాడు మండలంలోని వెంకటనగరం గ్రామానికి ఆరు కిలోమీటర్ల దూరంలో తోటపల్లి గ్రామం శివారున కొండల మాటున తోటపల్లి జలపాతం ఉంది. ఈ జలపాత ప్రదేశం ధారా మల్లికార్జునస్వామిగా శివలింగం జలపాతాలను అభిషేకిస్తూ ప్రసిద్ధి పొందింది. కార్తీకమాసం మహాశివరాత్రి పర్వదినాలతోపాటు వేసవిలో కూడా ఈ ప్రదేశం జనసందోహంగా కళకళలాడుతూ ఉంటుంది. వన సమారాధనల పేరుతో నిత్యం ఇక్కడ అన్నసంతర్పణలు పెద్దఎత్తున నిర్వహిస్తున్నారు. ఈ మూడు ప్రదేశాలు ఇప్పుడిప్పుడే పర్యాటకులు, సందర్శకులతో కోలాహలంగా మారుతున్నాయి. వీటిపై ప్రభుత్వం దృష్టిసారించి పర్యాటకులను మరింత ఆకర్షించేలా సౌకర్యాలు కల్పిస్తే ఈ ప్రదేశాలు ఎంతో అభివృద్ధి చెందుతాయని పలువురు సూచిస్తున్నారు.