ఏపీవీవీపీ ఆస్పత్రులకు మెడికల్‌ ఆఫీసర్ల నియామకం

చిత్తూరు రూరల్‌, నవంబరు 5: రీస్ట్రక్చరింగ్‌లో భాగంగా ఏపీ వైద్యవిధాన్‌ పరిషత్‌ పరిధిలోని ఒక ఏరియా, ఆరు సీహెచ్‌సీల్లో మెడికల్‌ ఆఫీసర్లు, మెడికల్‌ సూపరింటెండెంట్‌ పోస్టులు ఖాళీ అయ్యాయి. వాటిని అక్కడే సివిల్‌ సర్జన్లుగా ఉన్న వైద్యులతో భర్తీ చేశారు. వారికి మెడికల్‌ ఆఫీసర్లు, మెడికల్‌ సూపరింటెండెంట్లుగా అధికారమిస్తూ శనివారం డీసీహెచ్‌ఎస్‌ బీసీకే నాయక్‌ ఉత్తర్వులు జారీ చేశారు. కుప్పం ఏరియా ఆస్పత్రి మెడికల్‌ సూపరింటెండెంట్‌గా సుధీర రమ్యాను నియమించారు. పుంగనూరు సీహెచ్‌సీకి జస్వంత్‌ ఏవీఎస్‌ రాయల్‌ను, వాయల్పాడు సీహెచ్‌సీకి ఫిరోజ్‌ బేగంను, మహల్‌ సీహెచ్‌సీకి కిరణ్‌కుమార్‌ను, కార్వేటినగరం సీహెచ్‌సీకి భాగ్యలక్ష్మిని, పెనుమూరు సీహెచ్‌సీకి గీతాకుమారిని, బంగారుపాళ్యం సీహెచ్‌సీకి విజయకుమారిని నియమించారు. వీరు త్వరలో బాధ్యతలు స్వీకరించనున్నారు.