రేపటిలోపు వేతనాలు చెల్లించాలి

భద్రాద్రి దేవస్థానం ఈవోకు కలెక్టర్‌ ఆదేశం

‘ఆంధ్రజ్యోతి’ కథనానికి స్పందన

భద్రాచలం, మార్చి 20: భద్రాచలంలోని శ్రీ సీతారామచంద్రస్వామి దేవస్థానంలో పని చేస్తున్న అవుట్‌సోర్సింగ్‌, తాత్కాలిక సిబ్బంది వేతనాలు సోమవారంలోపు పూర్తిగా చెల్లించాలని దేవస్థానం ఈవో బి.శివాజీని భదారద్రి జిల్లా కలెక్టర్‌ ఎంవీ. రెడ్డి ఆదేశించారు. ఈ వేతనాల సమస్యపై ‘కమిషనర్‌ ఆదేశాలు బేఖతారు’ ఏడు నెలలుగా వేతనాలు అందని సిబ్బంది అనే శీర్షికన ‘ఆంధ్రజ్యోతి’లో వెలువడిన కథనంపై కలెక్టర్‌ స్పందించారు. ఈ విషయంపై దేవస్థానం అధికారులను కొత్తగూడెంలోని తన కార్యాలయానికి పిలిపించిన కలెక్టర్‌ వారితో ఈ విషయంపై విచారించినట్లు విశ్వసనీయ సమాచారం. ఈ సందర్భంగా సిబ్బంది వేతనాలు సోమవారం చెల్లించాలని కలెక్టర్‌ ఆదేశించారు. దేవస్థానంలో పనిచేస్తున్న సిబ్బందికి నిర్దేశించిన ప్రకారం వేతనాలు వారి బ్యాంకు ఖాతాల్లో జమ అవుతున్నాయా లేదా..? అనే విషయంపై స్టేట్‌మెంట్లను తీసుకొని బుధవారం రావాలని ఆదేశించినట్లు తెలిసింది. ఈ విషయంపై దేవస్థానం అధికారుల తీరుపై కలెక్టర్‌ తీవ్రంగా ఆగ్రహం వ్యక్తం చేసినట్లు వినికిడి.