పినపాక, కరకగూడెం మండలాలకు మహర్దశ

 విప్‌ రేగా కాంతారావు కృషితో నిధులు మంజూరు

 పినపాక, మార్చి 24 : పినపాక నియోజకవర్గంలోని పూర్తి  ఏజెన్సీ మండలాలైన పినపాక కరకగూడెం మండలాల అభివృద్ధి పనులకు మహర్దశ పట్టనుంది. పినపాక నియోజకవర్గ ఎమ్మెల్యే ప్రభుత్వ విప్‌ రేగా కాంతారావు కృషితో ఏళ్లతరబడి ఎదురుచూస్తున్న పలు అభివృద్ధి పనులు ప్రారంభం కానున్నాయి. ఈ మేరకు ‘ఆంధ్రజ్యోతి’తో బుధవారం ఆయన ఫోన్‌లో సంభాషించారు. ఈ రెండు మండలాల్లో దాదాపు రూ,6 కోట్ల 17.4 లక్షల అభివృద్ధి పనులకు వచ్చే నెలలో టెండర్లు పిలిచి, ప్రారంభించనున్నట్లు ఆయన తెలిపారు. ఈ సందర్భంగా ఆయా మండలాల్లో నిధులు మంజూరైన పనుల వివరాలను వెల్లడించారు. పినపాక మండలం బోటిగూడెం పంచాయతీ మారేడుగూడెం బ్రిడ్జి నిర్మాణానికి రూ, 30 లక్షలు , బయ్యారం - బెస్తగూడెం రహదారి పనులకు రూ, 3 కోట్ల 11 లక్షలు, కరకగూడెం మండలంలోని ముంకుటి వర్రెకు రూ.1 కోటి 24 లక్షలు, వట్టివాగుపై రూ.2 కోట్ల 52 లక్షలు మంజూరయ్యాయన్నారు. ఈ సందర్భంగా ముఖ్యమంత్రి కేసీఆర్‌ ఏజెన్సీ అభివృద్ధి పై ప్రత్యేక దృష్టి సారించారన్నారు. త్వరలోనే పనులన్నింటికి టెండర్లు పిలవడం జరుగుతుందని, ఏప్రిల్‌ 15 తర్వాత పనులు ప్రారంభిస్తామని తెలిపారు.