బైక్ కొంటామంటూ షోరూమ్‌కు వెళ్లి.. ఊహించని షాకిచ్చిన యువ జంట.. సీసీ కెమెరాలో..

మీరు `మన్మథుడు` సినిమా చూశారా? ఆ సినిమాలో హీరో నాగార్జున, బ్రహ్మానందం ఓ చెప్పుల షాపులో బూట్లు తీసుకుని పరిగెత్తి చూస్తామని చెప్పి పారిపోతారు. అదే ట్రిక్కును ఉపయోగించి పంజాబ్‌లోని జలంధర్‌లో ఓ జంట బైక్‌తో సహా పరారైంది. వారు వెనక్కి తిరిగి వస్తారని చూస్తూ కూర్చున్న షాప్ యజమానికి నిరాశే మిగిలింది. దీంతో అతను పోలీసులను ఆశ్రయించాడు. 

జలంధర్‌లోని `శివ ఆటో డీల్` షోరూమ్‌కు బుధవారం ఓ జంట బైక్ కొంటామంటూ వచ్చింది. ఆ షాప్ ఓనర్ సంజీవ్ వారికి పల్సర్ బైక్ చూపించి దాని విశేషాలు వివరించాడు. వారు టెస్ట్ డ్రైవింగ్ చేస్తామన్నారు. అందుకు సంజీవ్ అంగీకరించడంతో వారిద్దరూ ఆ బైక్‌ను తీసుకెళ్లారు. అయితే ఎంతకీ తిరిగి రాలేదు. దీంతో సంజీవ్ పోలీసులను ఆశ్రయించాడు. షాప్‌లోని సీసీటీవీ ఫుటేజ్‌ పరిశీలించిన పోలీసులు దొంగల కోసం గాలిస్తున్నారు. వారు తీసుకెళ్లిన బైక్ నెంబర్, వారి ఫొటోలు సమీపంలోని అన్ని పోలీస్ స్టేషన్లకూ పంపించారు.