కొవిడ్‌ కారణంగా పెరిగిన లైంగిక హింస:యూఎన్‌

ఐక్యరాజ్యసమితి, ఏప్రిల్‌ 13: కొవిడ్‌ మహమ్మారి కారణంగా గత ఏడాది లైంగిక హింస పెరిగిందని ఐక్యరాజ్యసమితి(యూఎన్‌) తాజాగా పేర్కొంది. ప్రపంచవ్యాప్తంగా పలు దేశాల్లో సైన్యాలు, సాయుధ మూకలు.. లైంగిక హింసను ఒక యుద్ధవ్యూహంగా, రాజకీయ అణచివేతకు ఉపయోగించుకున్నాయని తెలిపింది. ఈ మేరకు ఒక నివేదికను విడుదల చేసింది. మొత్తం 18 దేశాల్లో 52 సైన్యాలు లేదా సాయుధ మూకలు మహిళలపై అకృత్యాలకు పాల్పడినట్లు తమ వద్ద ధ్రువీకృత సమాచారం ఉందని ఆ నివేదికలో స్పష్టం చేసింది. ‘‘ఈ దారుణాలకు పాల్పడుతున్న వాటిలో అత్యధిక శాతం ప్రభుత్వేతర మూకలు ఉన్నాయి. ప్రతిపక్షాలు, తిరుగుబాటు బృందాలు, అల్‌ఖైదా లేదా ఇస్లామిక్‌ స్టేట్‌తో సంబంధమున్న ఉగ్రమూకలు ఎక్కువగా ఉన్నాయి. ఈ జాబితాలో ఉన్న ప్రభుత్వ సైన్యం లేదా అధికారిక పోలీసు బలగాలను ఐక్యరాజ్యసమితి శాంతి కార్యకలాపాల్లో పాల్గొనకుండా నిషేధించాం. ఈ బ్లాక్‌లి్‌స్టలో కాంగో, దక్షిన సూడాన్‌లోని ప్రభుత్వ, పోలీసు బలగాలు, సిరియా నిఘా వర్గాలు, సూడాన్‌లో సాయుధ బలగాలు ఉన్నాయి. చాలా చోట్ల మహిళల అవసరాల్ని ఆసరాగా చేసుకుని, వారిపై అత్యాచారాలకు ఒడిగడుతున్నారు.’’ అని ఆ నివేదికలో యూఎన్‌ పేర్కొంది.