‘డూయింగ్ బిజినెస్’ ర్యాంకుల నిలిపివేత
ABN , First Publish Date - 2021-09-18T08:06:34+05:30 IST
వ్యాపారం చేయడానికి అనుకూల పరిస్థితులను విశ్లేషిస్తూ వివిధ దేశాలకు ర్యాంకులను కేటాయించే ‘డూయింగ్ బిజినెస్’ నివేదికను ఇక నుంచి ఆపేస్తున్నట్టు వరల్డ్ బ్యాంక్ ప్రకటించింది...
- చైనాకు అనుకూలంగా డేటా మార్చిన వరల్డ్ బ్యాంక్ సిబ్బంది?
న్యూఢిల్లీ, సెప్టెంబరు 17: వ్యాపారం చేయడానికి అనుకూల పరిస్థితులను విశ్లేషిస్తూ వివిధ దేశాలకు ర్యాంకులను కేటాయించే ‘డూయింగ్ బిజినెస్’ నివేదికను ఇక నుంచి ఆపేస్తున్నట్టు వరల్డ్ బ్యాంక్ ప్రకటించింది. నివేదికల రూపకల్పనలో అక్రమాలు చోటుచేసుకున్నట్టు ఆరోపణలు రావడంతో వరల్డ్ బ్యాంక్ ఈ నిర్ణయం తీసుకుంది. ముఖ్యంగా 2017, 2018, 2020 సంవత్సరాలకు సంబంధించిన నివేదికల రూపకల్పనలో వరల్డ్ బ్యాంక్ గ్రూప్ సిబ్బంది చైనా పట్ల పక్షపాతంతో వ్యవహరించినట్టు ఆరోపణలు వెలువడ్డాయి. చైనాకు మంచి ర్యాంకు వచ్చేలా గ్రూప్లోని ఉన్నత స్థాయి సిబ్బంది డేటాను మార్చారనే విమర్శలొచ్చాయి. అంతర్గతవిచారణ చేపట్టిన వరల్డ్ బ్యాంక్ పాత నివేదికలు, ఆడిట్లను సమీక్షించిన తర్వాత నివేదిక ప్రచురణను నిలిపివేయాలని నిర్ణయించినట్టు పేర్కొంది. దీని స్థానంలో కొత్త పద్ధతిలో ర్యాంకింగ్ విధానాన్ని రూపొందించనున్నట్టు తెలిపింది.