డేరా బాబాకు జీవిత ఖైదు
ABN , First Publish Date - 2021-10-19T07:15:01+05:30 IST
డేరా సచ్చా సౌదా చీఫ్, వివాదాస్పద మత గురువు గుర్మీత్ రాం రహీం సింగ్ (డేరా బాబా)కు సీబీఐ ప్రత్యేక న్యాయస్థానం ....
చండీగఢ్, అక్టోబరు 18: డేరా సచ్చా సౌదా చీఫ్, వివాదాస్పద మత గురువు గుర్మీత్ రాం రహీం సింగ్ (డేరా బాబా)కు సీబీఐ ప్రత్యేక న్యాయస్థానం సోమవారం జీవిత కారాగార శిక్ష విధించింది. అతనితో పాటు మరో నలుగురికి కూడా ఇదే శిక్ష ఖరారు చేసింది. 19 ఏళ్ల క్రితం జరిగిన డేరా సచ్చా సౌదా మేనేజర్ రంజిత్ సింగ్ హత్య కేసులో విచారణ అనంతరం కోర్టు ఈ మేరకు తీర్పునిచ్చింది. ఈ కేసులో పంచకులలోని సీబీఐ ప్రత్యేక కోర్టు రాం రహీం సింగ్తో పాటు కృష్ణణ్ లాల్, జస్బీర్ సింగ్, అవతార్ సింగ్, సబ్దిల్లను కూడా దోషులుగా నిర్ధారించింది. డేరా సచ్చా సౌదా మేనేజర్ రంజిత్ సింగ్ ఖాన్పూర్ కోలియన్ గ్రామంలో 2002 జూలై 10న హత్యకు గురయ్యాడు. డేరా ఆశ్రమంలో మహిళలపై జరిగే లైంగిక వేధింపులను పేర్కొంటూ అప్పట్లో విడుదలైన ఓ లేఖ సంచలనం సృష్టించింది. ఈ లేఖను రంజిత్ సింగ్ రాసినట్లు డేరా బాబా అనుమానించారు. ఈ తరుణంలో డేరా బాబానే ఈ హత్యకు కుట్ర పన్నినట్లు సీబీఐ చార్జిషీటు దాఖలు చేసింది.