శైవక్షేత్రాలకు ప్రత్యేక బస్సులు

ఆర్టీసీ డిప్యూటీ సీటీఎం కేవీ రమణ

కడప(మారుతీనగర్‌), నవంబరు 5: కార్తీకమాసం సందర్భంగా జిల్లాలోని వివిధ శైవక్షేత్రాలను భక్తులు దర్శించుకునేందుకు వీలుగా ఈ నెల 8, 15, 22, 29, తేదీలతో (సోమవారాలు) పాటు కార్తీకపౌర్ణమి రోజైన 18 వతేదీన ఆర్టీసీ ప్రత్యేకంగా బస్సులను ఏర్పాటుచేసిందని ఆర్టీసీ డిప్యూటీ సీటీఎం కేవీ రమణ పేర్కొన్నారు. ఈ మేరకు శుక్రవారం స్థానిక ఆర్‌ఎం కార్యాలయంలోని తన చాంబర్‌లో విలేకరుల సమావేశంలో డిప్యూటీ సీటీఎం మాట్లాడారు. పుష్పగిరి, అల్లాడుపల్లె ఆలయాలు, కల్యాణతీర్థం, యాగంటి, మహానంది శైవక్షేత్రాలకు పై తెలిపిన తేదీలలో ఉదయం 5-30 నిమిషాలకు కడప కొత్తబస్టాండు నుంచి బస్సు బయలుదేరి, తిరిగి అదేరోజు రాత్రి 9-30 గంటలకు కడప చేరుతుందన్నారు. ఇందులో పెద్దలకు రూ.550, పిల్లలకు రూ.275 చార్జి ఉంటుందన్నారు. ప్రతి రోజు శ్రీశైలం క్షేత్రానికి కడప డిపో నుంచి తెల్లవారుజామున 5 గంటలకు, మధ్యాహ్నం 1-30 గంటలకు రెండు బస్సులను తిప్పుతున్నామన్నారు. జిల్లాలోని ఏ ప్రదేశం నుంచి అయినా 50 మంది ప్రయాణికులు పై తెలిపిన శైవక్షేత్రాలకు వెళ్లదలచుకుంటే వారి వద్దకే బస్సు వెళ్లి క్షేత్రదర్శినికి ఉపకరిస్తుందన్నారు.