సర్పంచ్‌, కార్యదర్శిని తొలగించాలి

జగిత్యాల అర్బన్‌, డిసెంబరు 03: గ్రామ పంచాయతీ కార్యాలయంలోని అవినీతి, అక్రమాలపై బాధ్యులైన గ్రామ సర్పంచ్‌ , కార్యదర్శిని తొలగించాలని డిమాండ్‌ చేస్తూ కలెక్టరేట్‌ కార్యాలయం ఎదుట ఇటిక్యాల గ్రామస్థులు ఆందోళన నిర్వహించారు. జగిత్యాల జిల్లా రాయికల్‌ మండలం ఇటిక్యాల గ్రామంలో 2019లో ఎస్‌ఎఫ్‌సీ కింద విడుదలైన రూ.5,58,000లను చట్టవ్యతిరేకంగా గ్రామ సర్పంచ్‌ తన స్వంత అవసరాల కొరకు విత్‌డ్రా చేసి వాడుకున్నారని ఆరోపించారు. గ్రామ పంచాయితీ కార్యవర్గ సమావేశం లేకుండానే , ఎలాంటి తీర్మానం చేయకుండానే తన స్వలాభం కొరకు రైతు వేదిక భవనాన్ని తనకు అనుకూలం ఉన్న చోట నిర్మాణం చేశారన్నారు. ఇటిక్యాల గ్రామంలో ప్రజా సమక్షంలో విచారణ జరిపి, బాధ్యులపై చట్టపరమైన కఠిన చర్యలు తీసుకోవడంతో పాటు, సంబంధిత సర్పంచ్‌, కార్యదర్శిని విధుల్లో నుంచి తొలగించాలని డిమాండ్‌ చేశారు. అంతకుముందు డీపీవో, కలెక్టరేట్‌ కార్యాలయాల్లో వినతిపత్రం అందించారు.