బ్రహ్మకమల దర్శనం.. ఉత్తరాఖండ్‌లో అరుదైన దృశ్యం

సిమ్లా: బ్రహ్మకమల దర్శనం జరిగింది. అత్యంత అరుదుగా పుష్పించే ఈ బ్రహ్మకమలం కేవలం హిమాలయాల్లో మాత్రమే సహజసిద్ధంగా వికసిస్తుంది. సాధారణంగా జూలై నుంచి సెప్టెంబరు మధ్య కాలంలోనే ఇది పుష్పిస్తుంది. అది కూడా కేవలం ఒక్క రాత్రి మాత్రమే ఇది కనిపిస్తుంది. ఈ పువ్వు రాత్రిళ్లు మాత్రమే వికసించడం వల్ల దీనికి రేరాణి అని కూడా పేరుంది. సైన్స్‌ పరంగా ఈ పువ్వును నైట్‌ బ్లాసమింగ్‌ సిరియస్‌ అని పిలుస్తారు. ఇందులో అనేక ఔషధ గుణాలుండడం వల్ల ఆయుర్వేద వైద్యంలో ఎక్కువగా వినియోగిస్తుంటారు. 

హిందూ ఇతిహాసాల ప్రకారం బ్రహ్మ లేత ఎరుపు రంగు పుష్పంలో కూర్చుని ఉంటాడు. ఆ పుష్పం కమలం అని అంటారు. అయితే కొందరి వాదన ఏంటంటే.. బ్రహ్మ కూర్చుని ఉండేది కమలంపై కాదు. అది బ్రహ్మకమలం. అందువల్లే ఈ పుష్పానికి బ్రహ్మకమలం అని పేరు వచ్చిందని వారు చెబుతుంటారు. దీనివల్ల దీనిని దేవతా పుష్పంగా భావిస్తుంటారు. అందువల్ల కేదార్‌నాథ్, బద్రీనాథ్‌ ఆలయాలకు వెళ్లే భక్తులు స్వామివార్లకు భక్తిశ్రద్ధలతో ఈ పుష్పాన్ని సమర్పిస్తుంటారు. ఎన్నో ఏళ్లుగా ఈ ఆనవాయితీ కొనసాగుతోంది.

హిమాలయాల్లోని కొండలపైనే కాకుండా స్థానిక ఇళ్లలో కూడా వికసిస్తుంటాయి. బ్రహ్మకమలం ఏ ఇంట్లో అయితే వికసిస్తుందో.. ఆ ఇంట్లో సర్వసౌఖ్యాలూ కలుగుతాయని, అందులో నివశించేవారు ఆయురారోగ్యాలతో, సిరిసంపదలతో తులతూగుతారని అక్కడి వారి నమ్మకం. మన భారత ప్రభుత్వం కూడా 1982లో ఈ బ్రహ్మకమలంపై అధికారిక పోస్టల్‌ స్టాంపును సైతం విడుదల చేసింది.

సైంటిస్టులు చెబుతున్న దాని ప్రకారం.. బ్రహ్మకమలం.. ఒకరకమైన బ్రహ్మజెముడు జాతికి చెందిన మొక్క. ఈ మొక్క పెరగడానికి ఎక్కువగా నీరు అవసరం లేదు. రెండు, మూడు రోజులకు ఒకసారి నీరు అందితే చాలు.. ఈ మొక్క హాయిగా జీవించగలుగుతుంది. అయితే ఈ పువ్వు చూడడానికి అందంగా ఉన్నా.. వాసన మాత్రం దుర్భరంగా ఉంటుంది. మీకు అల్లుఅర్జున్‌ నటించిన బద్రీనాథ్‌ సినిమా గుర్తుండే ఉంటుంది కదా.. అందులో అల్లుఅర్జున్‌.. తమన్నాను వెంటబెట్టుకుని వెళ్లి మరీ కోయించేది ఈ పువ్వునే.. గుర్తుకొచ్చిందా..?