కరోనా కలకలం: ప్రపంచ దేశాలకు వరల్డ్ బ్యాంక్, ఐఎమ్ఎఫ్ ముఖ్య సూచన

వాషింగ్టన్: కరోనాతో ముమ్మర పోరాటం జరుగుతున్న నేపథ్యంలో అభివృద్ధి చెందుతున్న దేశాలకు ఇచ్చిన రుణాల విషయంలో కొంత వెసులుబాటు కల్పించాలని ప్రపంచ బ్యాంకు, అంతర్జాతీయ ద్రవ్యనిధి.. ప్రపంచ దేశాలను కోరాయి. వాయిదాల చెల్లింపులను తాత్కాలికంగా నిలిపివేసేందుకు ఆయా దేశాలకు అవకాశం ఇవ్వాలని అవి కోరాయి.  మార్కెట్లు కోలుకునేందుకు కూడా ఈ చర్య ఉపకరిస్తుందని అవి అభిప్రాయపడ్డాయి. అయితే ఈ వెసులుబాటు అన్ని అభివృద్ధి చెందుతున్న దేశాలకు వర్తించదని తెలుస్తోంది. అత్యంత దారిద్ర్యంలో ఉన్న పేదలకోసం ఏర్పాటు చేసిన ఐడీఏ ఫండ్ నుంచి నిధులు పొందుతున్న వాటికి మాత్రమే ఈ వెసులుబాటు కల్పించాలని అవి సూచించినట్టు తెలుస్తోంది.