వరవరరావుకు బెయిల్‌ నిరాకరణ

ముంబై, నవంబరు 12: భీమా కోరేగావ్‌ కేసులో అరెస్టయి జైలులో ఉంటున్న విప్లవ కవి వరవరరావుకు ముంబై హైకోర్టు బెయిల్‌ నిరాకరించింది. ఆయన ఆరోగ్యం తీవ్రంగా క్షీణిస్తోందని, మెరుగైన చికిత్స కోసం నానావతి ఆస్పత్రికి తరలించాలని, వైద్యం అందించేందుకు స్వతంత్ర మెడికల్‌ బోర్డును ఏర్పాటు చేయాలని, వరవరరావును బెయిల్‌పై విడుదల చేయాలని ఆయన సతీమణి హేమలత కోర్టును ఆశ్రయించారు. ఏకే మీనన్‌ నేతృత్వంలోని డివిజన్‌ బెంచ్‌ గురువారం ఈ పిటిషన్‌ను విచారించింది. నానావతి ఆస్పత్రి డాక్టర్ల బృందంతో వీడియో కాల్‌ ద్వారా వరవరరావుకు వైద్య పరీక్షలు నిర్వహించాలని, అవసరమైతే నేరుగా వెళ్లి పరీక్షించాలని ఆదేశించింది. వరవరరావు అనారోగ్యంతో మంచం పట్టారని, అలాంటి వ్యక్తి చట్టం నుంచి ఎలా పారిపోతారని ఆయన తరఫు న్యాయవాది ఇందిరా జైసింగ్‌ వాదనలు వినిపించారు. తదుపరి విచారణను కోర్టు మంగళవారానికి వాయిదా వేసింది.