దేశంలో మొత్తం 28 కరోనా కేసులు.. ప్రకటించిన కేంద్ర మంత్రి

న్యూఢిల్లీ: భారత దేశంలో మొత్తం 28 కరోనా కేసులు నమోదయ్యాయని కేంద్ర ఆరోగ్యశాఖ మంత్రి హర్షవర్ధన్ వెల్లడించారు. బుధవారం మీడియాతో మాట్లాడిన ఆయన ఈ వివరాలను తెలియజేశారు. ఈ 28 కేసుల్లో మూడు కేరళ రాష్ట్రంలో నమోదయ్యాయని, అయితే సదరు పేషెంట్లను చికిత్స అనంతరం డిశ్చార్జి చేశామని ఆయన తెలిపారు. కేరళకు చెందిన ముగ్గురు కరోనా పేషెంట్లు కోలుకున్నారని, అందుకే వారిని డిశ్చార్జి చేశామని స్పష్టంచేశారు. ఈ 28 మంది కరోనా పీడితుల్లో 14మంది ఇటలీ దేశస్థులని చెప్పారు. వీరందరినీ చావ్లా ప్రాంతంలోని ఇండో టిబెటన్ బోర్డర్ పోలీస్(ఐటీబీపీ)కి చెందిన ఐసోలేటెడ్ ఫెసిలిటీకి తరలించామన్నారు. మొత్తం 21మంది ఇటలీవాసులకు కరోనా పరీక్షలు చేయగా, వారిలో 14మందికి పాజిటివ్ ఫలితాలొచ్చాయని తెలిపారు.