ధూమపానం మానేస్తే...

న్యూఢిల్లీ : ధూమపానంతో జరిగే నష్టాన్ని సొంతంగా సరిచేసుకునే సామర్థ్యం ఊపిరితిత్తులకు ఉందని పరిశోధకులు చెబుతున్నారు. అయితే ధూమపానాన్ని మానేసినప్పుడు మాత్రమే అది సాధ్యపడుతుందని స్పష్టం చేస్తున్నారు. ఊపిరితిత్తుల క్యాన్సర్‌కు దారితీసే కణాల పరివర్తనాలు శాశ్వతమని, ధూమపానం మానేసిన తర్వాత కూడా అవి అలాగే ఉంటాయని పరిశోధకులు ఇప్పటివరకూ భావిస్తూ వచ్చారు. అయితే... ‘నేచర్’ మ్యాగజీన్‌లో ప్రచురిచితమైన అధ్యయన ఫలితాలు ఇందుకు భిన్నంగా ఉన్నాయి.

నష్టం నుంచి తప్పించుకునే కొన్ని కణాలు... ఊపిరితిత్తులను మళ్లీ బాగుచేయగలవని ఆ అధ్యయనం వెల్లడించింది. నలభై ఏళ్లపాటు రోజుకు పది సిగరెట్లు తాగి మానేసినవారిలోనూ ఈ లక్షణం కనిపించిందని తెలిపింది. పొగాకు ఉత్పత్తుల్లో ఉండే వేల రసాయనాలు ఊపిరితిత్తుల్లోని కణాల్లో డీఎన్ఏకు నష్టం చేసి, దానిలో పరివర్తనాలకు కారణమవుతాయి. దీంతో నెమ్మదిగా ఆ కణాలు క్యాన్సర్ కణాలుగా మారతాయి.

ధూమపానం అలవాటు ఉన్నవారిలో క్యాన్సర్ రాకముందు కూడా ఇది పెద్ద స్థాయిలో జరుగుతున్నట్లు అధ్యయనంలో తెలింది. ధూమపానం అలవాటు ఉన్నవారి శ్వాసనాళాల్లోని కణాల్లో చాలా వరకూ పొగాకు ఉత్పత్తుల కారణంగా పరివర్తనానికి లోనవుతున్నాయి. దాదాపు పది వేల వరకూ జన్యుపరమైన మార్పులు వాటిలో వస్తున్నట్లు తేలింది. ఈ కణాల కారణంగా క్యాన్సర్ సోకే అవకాశముందని లండన్ యూనివర్సిటీ కాలేజ్‌కు చెందిన పరిశోధకుడు డాక్టర్ కేట్ గోవర్స్ పేర్కొన్నారు. అయితే, దుష్ప్రభావం పడకుండా తప్పించుకుంటున్న కణాలు కూడా స్వల్ప పరిమాణంలో ఉంటున్నాయి.

ధూమపానం వల్ల జరిగే జన్యుపరమైన నష్టం నుంచి ఈ కణాలు ఎలా బయటపడుతున్నాయన్న విషయంపై మాత్రం ఇంకా స్పష్టత రాలేదు. కానీ... ధూమపానం మానేసిన తర్వాత ఇవి పెరిగి, ఊపిరితిత్తుల్లో పాడైపోయిన కణాలను భర్తీ చేస్తున్నట్లు పరిశోధకులు చెప్పారు. ధూమపానం మానేసిన వారిలో 40 శాతం వరకూ కణాలు, అసలు ఆ అలవాటు లేనివారిలో ఉన్నట్లుగానే ఉంటున్నాయని పరిశోధకులు చెబుతున్నారు. ‘ఇది ఆశ్చర్యం కలిగింది. శ్వాసనాళాల్లో పొరలను ఈ కణాలు బాగు చేస్తున్నాయి. నలభై ఏళ్లు ధూమపానం చేసి, ఆ తర్వాత మానేసినవారిలోనూ కొత్త కణాల పుట్టుకకు ఇవి కారణమవుతుండటం గమనించడగ్గ విషయం’ అని సాంగెర్ ఇన్‌స్టిట్యూట్‌కు చెందిన డాక్టర్ పీటర్ క్యాంప్‌బెల్ పేర్కొన్నారు. కాగా... ఊపిరితిత్తులు ఎంత వరకూ బాగుపడుతున్నాయనేది పరిశోధకులు ఇంకా గుర్తించాల్సి ఉంది.

ఇదిలా ఉంటే... ధూమపానం మానేసిన రోజు నుంచే ఊపిరితిత్తుల క్యాన్సర్ ముప్పు తగ్గుతుందని ఇదివరకు చాలా అధ్యయనాల్లో తేలింది. ''పొగాకు వల్ల కలిగే నష్టాన్ని ఆపడంతోపాటు, జరిగిన నష్టాన్ని పూడ్చుకునే అవకాశం కూడా ఉంది. 

ధూమపానం మానే దిశగా ధూమపాన ప్రియులను ప్రోత్సహించే విషయం ఇది’ అని యూకే క్యాన్సర్ రీసెర్చ్ పరిశోధనా సంస్థకు చెందిన డాక్టర్ ఓరిట్ పేర్కొన్నారు.