Live
TV
గ్రామకంఠంపై వివాదం
ABN , First Publish Date - 2020-12-07T04:44:32+05:30 IST
చింతలపేట గ్రామకంఠం విషయంలో ఇరు వర్గాల మధ్య వివాదం నెలకొంది.
గుర్ల, డిసెంబరు 6: చింతలపేట గ్రామకంఠం విషయంలో ఇరు వర్గాల మధ్య వివాదం నెలకొంది. మొత్తంగా 60 సెంట్ల విస్తీర్ణంలో 20 సెంట్లలో నిర్మాణాలు చేపట్టడంపై ఓ వర్గం నేతలు రెవెన్యూ శాఖకు ఫిర్యాదు చేశారు. దీంతో ఆదివారం తహసీల్దార్‌ లావణ్య, మండల అధికారులు, సర్వేయర్లు , సచివాలయ ఉద్యోగులు, పోలీసులు ఆ స్థలాన్ని పరిశీలించారు. ఆ ప్రాంతంలో స్థానికులు వేసిన పునాదులను తవ్వేశారు. గ్రామకంఠంలో నిర్మాణాలు చేపట్టరాదని వారు హెచ్చరించారు. తమ పూర్వీకుల నుంచి ఈ స్థలంలో పశువుల శాలలు , ఇళ్లు నిర్మించుకుని ఉంటే.. ఇప్పుడు అధికారులు అభ్యంతరం తెలపడం తగదని ఆ ప్రాంత వాసులు తెలిపారు. దీంతో వారి మధ్య వాగ్వాదం చోటుచేసుకుంది. అక్కడ బోర్డులు ఏర్పాటు చేసేందుకు అధికారులు ప్రయత్నించగా మహిళలు అడ్డుకున్నారు. దీంతో రెవెన్యూ సిబ్బంది, పోలీసులు వెనుదిరిగారు. ఉన్నతాధికారులకు నివేదిక అందజేసి తదుపరి చర్యలు తీసుకుంటామని తహసీల్దార్‌ లావణ్య తెలిపారు.
