దేవరపాళెంలో ఉద్రిక్తత

వివాదాస్పదంగా పెన్నాబాట

నెల్లూరు(ఆంధ్రజ్యోతి): నెల్లూరు రూరల్ మండలం దేవరపాళెం గ్రామంలో ఆదివారం రాత్రి ఉద్రిక్త పరిస్థితులు నెలకొన్నాయి. గ్రామానికి చెందిన రెండు వర్గాల మధ్య ఓ బాట నిర్మాణం విషయం వివాదానికి దారితీసింది. గ్రామానికి సమాపాన కొండబోటు వద్ద పెన్నా పరీవాహక ప్రాంతంలోకి వెళ్లే మార్గంలో అధికార పక్షానికి చెందిన కొందరు నేతలు స్థానిక వేరుశనగ రైతులకు వ్యతిరేకంగా బాట నిర్మిస్తున్నారంటూ మరో వర్గం ఆటకాయింపునకు దిగింది. ఇసుక అక్రమంగా తరలించేందుకు ఈ బాట వేస్తున్నారంటూ ఆ వర్గం ఆరోపించింది. కాగా తమకు పట్టాహక్కు కలిగిన పొలాల్లో మొక్కలు తీసేందుకు ఎక్స్‌కవేటర్‌తో బాట వేసుకునేందుకు సిద్ధమయ్యామని, ఇసుక తవ్వకాలకు తాము వెళ్లలేదని అధికార పక్షం స్పష్టం చేసింది. ఈ వివాదంతో గ్రామంలో ఆందోళనకర పరిస్థితులు నెలకొన్నాయి.