‘మంజూరైన బ్రిడ్జీలను ఆపిన ఘనత వైసీపీ ప్రభుత్వానిదే...’

చిట్వేలి, డిసెంబరు6 : రాష్ట్రంలో గతంలో మంజూరైన బ్రిడ్జీలను ఆపిన ఘనత వైసీపీ ప్రభుత్వానికి దక్కుతుందని మాజీ ఎమ్మెల్సీ రాజంపేట నియోజకవర్గ టీడీపీ ఇన్‌చార్జి, రాష్ట్ర ప్రధాన కార్యదర్శి బత్యాల చెంగల్‌రాయులు ఆరోపించారు. ఆదివారం మండల పరిధిలోని మైనపల్లె పంచాయతీ కొండ్లోపల్లె - రాచపల్లె కొట్టుకుపోయిన వంతెనను మండల టీడీపీ సీనియర్‌ నాయకులు బాలు రామాంజనేయులు, లారీ సుబ్బరాయుడుతో కలిసి ఆయన పరిశీలించారు. ఈ సందర్భంగా ఆయన మాట్లాడుతూ గతంలో తెలుగుదేశం హయాంలో బ్రిడ్జీకి 2,15కోట్ల రూపాయలు మంజూరైందన్నారు. అయితే జగన్‌మోహన్‌రెడ్డి ప్రభుత్వం అధికారంలోకి రాగానే ఐదు నెలల్లో బ్రిడ్జీని ఆపిన ఘనత వైసీపీ ప్రభుత్వానికే దక్కుతుందని ఆయన ఆరోపించారు.  ఈ కార్యక్రమంలో రాచపల్లె గ్రామప్రజలు, కొత్తపల్లె గ్రామ ప్రజలు, టీడీపీ కార్యకర్తలు పాల్గొన్నారు.