రోడ్ల దుస్థితిపై బీజేపీ ఆందోళన

కాకినాడ (ఆంధ్రజ్యోతి), డిసెంబరు 5 : రోడ్ల దుస్థితిని పట్టించుకోని ప్రభుత్వ నిర్లక్ష్యాన్ని నిరసిస్తూ బీజేపీ ఆధ్వర్యంలో జిల్లావ్యాప్తంగా అధ్వానంగా ఉన్న రోడ్ల వద్ద శనివారం ధర్నాలు నిర్వహించింది. కోనసీమతోపాటు కాకినాడ, రాజమహేంద్రవరం, అన్ని మండల కేంద్రాల వద్ద ఈ నిరసనలు జరిగాయి. కొత్తపేటలో జరిగిన ధర్నాలో బీజేపీ రాష్ట్ర అధ్యక్షుడు సోము వీర్రాజు పాల్గొన్నారు. ఈ సందర్భంగా ఆయన మాట్లాడు తూ రోడ్లు అధ్వానంగా ఉండడంతో నిత్యం ప్రమాదాలు జరుగుతున్నాయని, ఎందరో ప్రాణాలను కోల్పోతున్నారన్నారు. యుద్ధప్రాతిపదికన రోడ్ల నిర్మాణం, మరమ్మతులు చేపట్టాలని డిమాండు చేశారు. బీజేపీ ఆధ్వర్యంలో జరిగిన ఈ నిరసన కార్యక్రమాల్లో చాలాచోట్ల జనసేన కూడా పాల్గొంది. సర్పవరం ఆటోనగర్‌ నుంచి పాదయాత్ర చేపట్టి మాధవపట్నం-సర్పవరం రహదారిపై బీజేపీ పార్లమెంటరీ అధ్యక్షుడు సీహెచ్‌ రామ్‌కుమార్‌, జనసేన పీఏసీ సభ్యులు పంతం నానాజీల ఆధ్వర్యంలో రాస్తారోకో నిర్వహించారు.