అమాత్యుడికీ పట్టని భౌతికదూరం

అనంతపురం(ఆంధ్రజ్యోతి): కూడేరు మండల కేంద్రంలో నూతనంగా నిర్మించిన తహసీల్దార్‌ కార్యాలయ భవనాన్ని సోమవారం రాష్ట్ర రోడ్లు, భవనాల శాఖ మంత్రి మాలగుండ్ల శంకర్‌నారాయణ అట్టహాసంగా ప్రారంభించారు. ఈ కార్యక్రమానికి వందలాది మంది అధికార పార్టీ నాయకులు, కార్యకర్తలు హాజరయ్యారు. కరోనా వైరస్‌ వ్యాప్తి జిల్లాలో ఉధృతంగా ఉన్న నేపథ్యంలో... భౌతికదూరాన్ని పాటిస్తూ.. ప్రారంభోత్సవ కార్యక్రమాన్ని నిర్వహించాల్సిన నిర్వాహకులు ఆ విషయాన్ని మరిచారు. ఎక్కడా భౌతికదూరం ఆ కార్యక్రమంలో కనిపించలేదు. అమాత్యుడికీ ఆ విషయం పట్టలేదు. కార్యక్రమం ప్రారంభం నుంచి.. చివరికి మీడియా సమావేశం వరకు మంత్రితోనే వందలాది మంది నాయకులు, కార్యకర్తలు భౌతికదూరానికి తిలోదకాలిస్తూ అంటకాగారు. ఇలా అయితే కరోనా వైరస్‌ వ్యాప్తి చెందదా అని అక్కడున్న సామాన్య జనం చర్చించుకోవడం విశేషం.