శ్రీలంక ఆటగాడు కుశాల్ మెండిస్ అరెస్టు

కొలంబో: శ్రీలంక కీపర్ బ్యాట్స్‌మన్ కుశాల్ మెండిస్‌ను పోలీసులు అరెస్ట్ చేశారు. ఈ రోజు ఉదయం కొలంబోలోని పానాదురా ప్రాంతంలో జరిగిన ఓ యాక్సిడెంట్ కేసుకు సంబంధించి కుశాల్‌ను అరెస్టు చేసినట్లు తెలుస్తోంది. పోలీసులు తెలిపిన వివరాల ప్రకారం.. తెల్లవారుజామున 5 గంటల సమయంలో కుశాల్ తన ఎస్‌యూవీలో బయటకు వెళ్లాడు. అయితే ఓల్డ్ గాలే రోడ్‌ వద్దకు వచ్చేసరికి ఎదురుగా సైకిల్‌పై వెళుతున్న ఓ వ్యక్తిని గుద్దేశాడు. దీంతో 64 ఏళ్ల ఆ వ్యక్తికి తీవ్ర గాయాలయ్యాయి. వెంటనే ఆసుపత్రికి తీసుకెళ్లగా చికిత్స పొందుతూ మరణించాడు. దీంతో పోలీసులు కుశాల్‌ను అదుపులోనికి తీసుకున్నారు. అతడిని న్యాయస్థానంలో ప్రవేశపెట్టినట్లు పోలీసులు తెలిపారు. తదుపరి విచారణ కొనసాగుతుందని, సంఘటనకు సంబంధించి పూర్తి వివరాలను సేకరించేందుకు ప్రయత్నిస్తున్నామని వెల్లడించారు.