దీర్ఘకాలిక లక్ష్యాలతో ఒత్తిడి
ABN , First Publish Date - 2020-05-15T10:16:09+05:30 IST
ఆటగాడు ఎవరైనా దీర్ఘకాలిక లక్ష్యాలు నిర్దేశించుకుంటే ఒత్తిడి తప్పదని టీమిండియా పరిమిత ఓవర్ల వైస్‌ కెప్టెన్‌ రోహిత్‌ శర్మ అభిప్రాయపడ్డాడు. అందుకే తాను...
ముంబై: ఆటగాడు ఎవరైనా దీర్ఘకాలిక లక్ష్యాలు నిర్దేశించుకుంటే ఒత్తిడి తప్పదని టీమిండియా పరిమిత ఓవర్ల వైస్‌ కెప్టెన్‌ రోహిత్‌ శర్మ అభిప్రాయపడ్డాడు. అందుకే తాను స్వల్పకాలిక లక్ష్యాల్ని పెట్టుకుంటానని చెప్పాడు. భవిష్యత్‌లో కూడా ఈ విధానాన్ని కొనసాగిస్తానని తెలిపాడు. ‘దీర్ఘకాలిక లక్ష్యాలు పెద్దగా ఫలితాలివ్వవని నా సుదీర్ఘ కెరీర్‌ ద్వారా అర్థమైంది. అంతేకాదు వాటివల్ల ఒత్తిడి కూడా ఏర్పడుతుందని గ్రహించా. అందువల్ల నేను ఎప్పుడూ రెండు, మూడు నెలల్లో జరిగే కొన్ని మ్యాచ్‌లను దృష్టిలో పెట్టుకునే సన్నద్ధమవుతుంటా. ఈ విధానం ఎంతో ఉత్తమం, ఉపయుక్తంగా కూడా ఉంటుంది’ అని రోహిత్‌ వివరించాడు. రాబోయే రోజుల్లోనూ ఈ పంథానే కొనసాగిస్తానని తెలిపాడు. లాక్‌డౌన్‌పై మాట్లాడుతూ..తామంతా క్రీడా కార్యక్రమాల పునరుద్ధరణకు ఎదురు చూస్తున్నామని తెలిపాడు. ‘క్రికెట్‌ పోటీలు మళ్లీ ఎప్పుడు మొదలవుతాయో ఓ అంచనాకు రాలేకపోతున్నాం. అయితే, త్వరలో పరిస్థితులు అనుకూలిస్తాయన్న ఆశాభావంతో ఉన్నాం. టీ20 వరల్డ్‌కప్‌, ఐపీఎల్‌లో ఏది ఆడతామో చూడాలి’ అని రోహిత్‌ అన్నాడు.
