అమెరికాలో 26ఏళ్ల భారతీయుడు అరెస్ట్.. జైలు శిక్ష విధించిన కోర్టు!

వాషింగ్టన్: తాను ఓ సినిమా ప్రోడ్యూసర్‌నని నమ్మబలికి.. కొంత మంది దగ్గర డబ్బులు వసూలు చేసి, మోసం చేసిన ఘటనలో 26ఏళ్ల  భారతీయ యువకుడు అమెరికాలో కటకటాలపాలయ్యాడు. వివరాల్లోకి వెళితే.. శివ చందన్ రెడ్డి అనే యువకుడు.. టెక్సాస్‌లోని ఇర్వింగ్ ప్రాంతంలో గత ఐదు సంవత్సరాలుగా నివసిస్తున్నాడు. ఈ క్రమంలో కొంత మంది అమెరికన్ పౌరులకు.. తనను తాను ఓ సినిమా ప్రోడ్యూసర్‌గా పరిచయం చేసుకున్నాడు. అంతేకాకుండా తాను ఓ సినిమా తీస్తున్నట్లు అమెరికన్లను నమ్మించి.. అందులో పెట్టుబడి పెట్టాల్సిందిగా కోరాడు. శివ చందన్ రెడ్డి మాటలను నమ్మిన సదరు అమెరికన్లు.. దాదాపు 1.60లక్షల డాలర్లను అతనికి సమర్పించుకున్నారు. తీరా అతను ప్రోడ్యూసర్ కాదని.. తాము ఇచ్చిన డబ్బును శివ చందన్ రెడ్డి.. తన సొంత ప్రయెజనాలకు వాడుకున్నాడని  తెలుసుకున్న అమెరికన్లు.. పోలీసులను ఆశ్రయించారు. దీంతో టెక్సాస్ పోలీసులు శివ చందన్ రెడ్డిని అరెస్ట్ చేసి.. కోర్టులో హాజరుపర్చారు. ఈ కేసును విచారించిన న్యాయం స్థానం.. శివ చందన్ రెడ్డిని దోషిగా తేల్చింది. అంతేకాకుండా 12నెలల జైలు శిక్షను విధించింది.