ఇద్దరు మహిళా శాస్త్రవేత్తలకు ‘రసాయన’ నోబెల్‌

• జన్యు సవరణ ప్రక్రియపై పరిశోధనలకు గుర్తింపు
  
• ఇద్దరిలో ఒకరు అమెరికన్‌.. మరొకరు ఫ్రెంచ్‌ శాస్త్రవేత్త
• కెమిస్ట్రీలో నోబెల్‌ ఇద్దరు మహిళలకు రావడం ఇదే తొలిసారి
• నోబెల్‌ విజేతలు జెన్నిఫర్‌ ఎ డౌడ్నా, ఎమ్మాన్యుయెల్లే చార్పెంటియర్‌

స్టాక్‌హోం, అక్టోబరు 7: రసాయన శాస్త్రంలో ఈ ఏడాది నోబెల్‌ బహుమతి ఇద్దరు మహిళా శాస్త్రవేత్తలను వరించింది. వారిలో ఒకరు ఫ్రాన్స్‌కు చెందిన ఎమ్మాన్యుయెల్లే చార్పెంటియర్‌ (51), మరొకరు అమెరికన్‌ శాస్త్రవేత్త జెన్నిఫర్‌ ఎ డౌడ్నా (56). వారసత్వంగా సంక్రమించే వ్యాధులను నివారించి, భవిష్యత్తులో కేన్సర్‌ను సైతం నయం చేయగల సత్తా ఉన్న జన్యుసవరణ ప్రక్రియ క్రిస్పర్‌-కాస్‌9 (CRISPR-CAS9 క్లస్టర్డ్‌ రెగ్యులర్లీ ఇంటర్‌స్పే్‌సడ్‌ షార్ట్‌ పాలిండ్రోమిక్‌ రిపీట్స్‌ అండ్‌-క్రిస్పర్‌ అసోసియేటెడ్‌ ప్రొటీన్‌ 9)ను అభివృద్ధి చేసినందుకు వీరికి ఈ పురస్కారాన్ని ప్రకటించారు. నిజానికి పలువురు శాస్త్రవేత్తలు ఈ విధానానికి సంబంధించిన కీలకమైన కృషి చేశారు. కానీ.. చాలా సులభంగా వినియోగించడానికి వీలుగా పరిజ్ఞానాన్ని అందుబాటులోకి తెచ్చినందుకుగాను డౌడ్నా, చార్పెంటియర్‌లకు ఈ పురస్కారం లభించింది.

రసాయన శాస్త్రంలో నోబెల్‌ బహుమతి ఇద్దరు మహిళలకు ప్రకటించడం ఇదే తొలిసారి. జంతువులు, మొక్కలు, సూక్ష్మజీవుల డీఎన్‌ఏలో మార్పుచేర్పులను ఈ విధానంలో అత్యంత కచ్చితత్వంతో చేయవచ్చు. వారు రూపొందించిన ఈ జన్యు ఉపకరణం ఎంతో శక్తిమంతమైనదని నోబెల్‌ కమిటీ సభ్యుడొకరు పేర్కొన్నారు. ఇది కొత్తరకం పంటల సృష్టికి దారిచూపిందని, భవిష్యత్తులో సరికొత్త వైద్య చికిత్సల రూపకల్పనకు కారణం కానుందని ఆయన వివరించారు. దెబ్బతిన్న జన్యువులను సరిచేయడానికి ఈ జన్యు సవరణ ప్రక్రియ ఎంతగానో ఉపయోగపడుతుందని, ఈ ఉపకరణం మానవాళికి ఎన్నో గొప్ప అవకాశాలను అందించనుందని ఆశాభావం వ్యక్తం చేశారు.

2018లో వెలుగులోకి..

చైనాకు చెందిన హిజియాన్‌కుయి అనే శాస్త్రవేత్త క్రిస్పర్‌ పరిజ్ఞానం ద్వారా 2018లో ప్రపంచంలోనే తొలిసారి జన్యుసవరణ శిశువులను సృష్టించి తీవ్ర విమర్శలపాలయ్యారు. ఎలాంటి అనుమతులూ లేకుండా ఈ ప్రయోగం చేశారు. హెచ్‌ఐవీ సోకిన పురుషుణ్ని, హెచ్‌ఐవీ లేని మహిళను ఎంచుకుని,  వారి శిశువులకు హెచ్‌ఐవీ సోకకుండా నిరోధించేలా జన్యుసవరణ చేశారాయన. ఈ ప్రయోగంలో ఆయన ఉపయోగించిన క్రిస్పర్‌ జన్యుసవరణ విధానం గురించి ప్రపంచం మొత్తానికీ తెలిసింది. ఆయన చేసిన పనివల్ల అవాంఛిత మార్పులు చోటు చేసుకుంటే.. అది భవిష్యత్‌ తరాలకు ముప్పంటూ ఆగ్రహం వ్యక్తమైంది. చైనా ప్రభుత్వం ఆయనకు మూడేళ్ల జైలు శిక్ష విధించింది.