బజాజ్‌ అలియాంజ్‌ ‘ఆరోగ్య సంజీవనీ పాలసీ’

ప్రైవేటు రంగంలోని బజాజ్‌ అలియాంజ్‌ జనరల్‌ ఇన్సూరెన్స్‌ కంపెనీ తన  ప్రామాణిక ఆరోగ్య బీమా పథకం  ‘ఆరోగ్య సంజీవనీ పాలసీ’ని అందుబాటులోకి తెచ్చింది. ఐఆర్‌డీఏఐ తాజాగా జారీ చేసిన మార్గదర్శకాలకు అనుగుణంగా ఈ పాలసీని కంపెనీ విడుదల చేసింది. ఇది వార్షిక పాలసీ. ఇందులో సమ్‌ ఇన్సూరెన్స్‌ రూ.లక్ష నుంచి రూ.5 లక్షల వరకు ఉంది. ఈ పాలసీని ఇండివిడ్యువల్స్‌కే కాకుండా కుటుంబానికి అంటే భార్య/భర్త, పిల్లలు, తల్లిదండ్రులు, అత్తామామకు ఫ్లోటర్‌ ప్లాన్‌ కింద పాలసీ తీసుకోవచ్చు. ఈ పాలసీ కింద ఆస్పత్రిలో చేరినప్పుడు అయ్యే వ్యయాలు, ఆయుష్‌ చికిత్స, మానసిక అనారోగ్యం, స్టెమ్‌సెల్‌ థెరపీ, రోబోటిక్‌ సర్జరీలు వంటి వాటికి కవరేజీ లభిస్తుంది.

ఈ పాలసీ కింద ప్రీమియంను వాయిదాల్లో చెల్లించవచ్చు. అంటే వార్షికంగా లేదా ఆరు నెలలు, మూడు నెలలు లేదా నెలవారీగా చెల్లించవచ్చు. ఈ పాలసీలో కనీస ప్రీమియం రూ.2,400 (జీఎ్‌సటీ కాకుండా) నుంచి ప్రారంభం అవుతుంది. పాలసీదారుని వయసు, సమ్‌ అష్యూరెన్స్‌ను బట్టి ప్రీమియం మారుతుంది. ఈ పాలసీ తీసుకోవడానికి కనీస వయసు 18 ఏళ్లు కాగా గరిష్ఠ వయసు పరిమితి 65 ఏళ్లు. తల్లిదండ్రుల మీద ఆధారపడిన పిల్లల వయసు 3 నెలల నుంచి 25 ఏళ్ల వరకు ఉండవచ్చు. ప్రీ హాస్పిటలైజేషన్‌ వ్యయాలకు 30 రోజుల వరకు, పోస్ట్‌ హాస్పిటలైజేషన్‌ వ్యయాలకు 60 రోజుల వరకు కవరేజీ లభిస్తుంది. ఈ పాలసీ కింద కోవిడ్‌-19 సంబంధిత హాస్పిటలైజేషన్‌ వ్యయాలకు కూడా కవరేజీ లభిస్తుందని కంపెనీ తెలిపింది.