అన్నా నువ్వు చీకటిని మింగే చంద్రుడివే!
ABN , First Publish Date - 2021-04-26T05:53:23+05:30 IST
ఎప్పుడో ఎక్కడో అవినీతి నియంత వంచిత శవం పాడుకున్న చావుపాట వినుంటావు ఊరి చివర కాలువ గట్టుకాడ దగాపడ్డ తలపాగా...
ఎప్పుడో ఎక్కడో
అవినీతి నియంత వంచిత శవం పాడుకున్న
చావుపాట వినుంటావు
ఊరి చివర కాలువ గట్టుకాడ దగాపడ్డ తలపాగా
ఉరేసుకున్న నయవంచిత కథ కనుంటావు
ఇన్నిజూసి రక్తం మరిగినోడివి రాజ్యమేలకుండా
కారడవులకి కాపయ్యావేందన్నా?
అడవిలో కాదు వెలుపలే మహారణ్యం ఉంది సోదరా!
గన్ను దించి కన్నెత్తి సూడు
రెపరెపలాడే పతాకంలో ధగధగలాడే నీ ప్రతాపాన్ని
జనంలోకొచ్చి ఎగరేసావంటే తిరుగులేని నాయకుడవుతావు
ఎందుకు ఈ నిస్పృహ
ప్రాణం నీదయినా నాదయినా
నీ నిరాశా నిశ్శబ్దం- నాటు తుపాకీలో తూటాగా పేలిన ప్రతిసారి
దేశం ఏడుస్తుందన్నా!
కొమ్మ చివర రెమ్మలో ఇరిసిన లేతాకు పాదాల పసిగుడ్డు
రేపు ఎదిగొస్తే చేతికి ఏమిస్తావు
బలపమా బల్లెమా....?
తావి తెగిన చెట్టులా
ఇంకా ఎన్ని తల్లిహృదయాలు పేగుతెంచుకుని కుప్పకూలాలి? తేల్చుకో
జనం మనం వనం నిజం - సంఘం సమాజం మిథ్యా
రణంతో రక్తం దానితో న్యాయం శాశ్వతం కాదు
కట్టుకున్నదీ! మనసుకి అంటుకున్నదీ!
ఒంటరితనం రుసరుసలనీ! కొండ గడ్డిపూచలతో గుసగుసలనీ!
స్వరాలు చేసుకొని రైక మాటు గుండెల్లో రగిలించుకొని
ఎడారి పాటొకటి పాడుకుంటూ!
నీ ఎడబాటు గమనంలో
ఎండిన కన్నీటి చెలమల్ని పిండుకొని ఏడుస్తుంది
ఇంకా అడవిలోనే ఉంటానంటావా..?
సెలికల్లో గొడ్లు కాసే ఈరిగాడి ఈల పాటలో ఆకలి శ్లోకం
కలుపు తీసే అమ్మ కట్టిన కొమ్మ ఊయల్లో పసికందు ఆక్రందన గేయం
దారుల్లేని తండాల్లో మౌనంగా వీచే చావు సంగీతం
ఈరోజుకు ఏమైనా మారాయా?
ఎన్నేళ్లయింది నువ్వు అడవులపాలయ్యి?
తుపాకులు కాలిస్తే ల్యాండు మైన్లు పూయిస్తే కాదు
అక్షరాలు దిద్దిస్తే చదువుని వెలిగిస్తేనే మనిషికి కొత్త వేకువ
ఏ సమాధులపై సమ సమాజాన్ని కలలుగంటున్నావు
నీ సిద్ధాంతమంతా రుధిర ఋతువు
తెగించిన తలలు తెగిన ప్రవాహం
సంధ్యా తిలకం మృత్యు ఘోష
వింధ్యా మలయ ప్రళయ శ్వాస
మాంసం ముద్దలు కట్టిన యమపాశం
ఇంకా ఎన్ని శిరస్సులు నేల రాలాలి?
ఇంకా ఎన్ని మొండాలు నేల వాలాలి?
ఏ శాంతి కోసం? ఏ కాంతి కోసం?
ఈ అశాంతి అంతఃరణక్షేత్రం
వదిలేసి రా అన్నా!
అన్నా నువ్వు చీకటిని మింగే చంద్రుడివే!
నీ వెన్నెల అడవిలో కాదు జనారణ్యంలో కురవాలి
ఇంకా ఆకలి ధూపంలో రగులుతున్న
దీపాల్లేని గుడారాలు తడవాలి వెలగాలి
అప్పుడే ప్రజాస్వామ్యానికి నిండు పౌర్ణమి
వెంకటేష్‌ పువ్వాడ
72047 09732
