టీఆర్ఎస్, బీజేపీ తీరుతో ప్రజాస్వామ్యం అపహాస్యం: దాసోజు శ్రవణ్

న్యూఢిల్లీ: కేంద్రంలో అధికారంలో ఉన్న బీజేపీ, తెలంగాణలో టీఆర్‌ఎస్ అధికార దుర్వినియోగానికి పాల్పడుతున్నందున హుజూరాబాద్ ఉప ఎన్నికను రద్దు చేయాలని భారత ఎన్నికల సంఘాన్ని (ఈసీఐ) ఏఐసీసీ జాతీయ అధికార ప్రతినిధి డాక్టర్ దాసోజు శ్రవణ్ కోరారు. కాంగ్రెస్ సీనియర్ నేతలతో పాటు డాక్టర్ దాసోజు శ్రవణ్ గురువారం న్యూఢిల్లీలో చీఫ్ ఎలక్షన్ కమిషనర్‌ను కలిశారు. 

ఈ సందర్భంగా దాసోజు శ్రవణ్ మాట్లాడుతూ హుజూరాబాద్‌లో బీజేపీ, టీఆర్ఎస్‌లు అమానుషంగా ప్రవర్తిస్తున్నాయన్నారు. ఈ రెండు పార్టీలు నిబంధనలు ఉల్లంఘిస్తున్నాయని, అధికార దుర్వినియోగానికి పాల్పడుతున్నాయని శ్రవణ్ ఆరోపించారు. ఎన్నికలు నిర్వహించే బదులు ఎమ్మెల్యే, ఎంపీ సీట్లను వేలం వేయాలని ఈసీ ఎగతాళి చేసిందని ఆయన వ్యాఖ్యానించారు. 

‘‘స్వేచ్ఛగా, నిష్పక్షపాతంగా ఎన్నికలు నిర్వహించకుండా బీజేపీ, టీఆర్ఎస్‌లు డబ్బులతో అడ్డుకోవడం చాలా బాధాకరం. ఎన్నికల ప్రవర్తనా నియమావళిని ఉల్లంఘిస్తూ ఓటర్లను ప్రభావితం చేస్తున్నారు. గతంలో ఎన్నడూ లేని విధంగా అధికార దుర్వినియోగం, డబ్బు, బహుమతుల పంపిణీలో మునిగిపోయారు. నగదు, చీరలు, పాత్రలు, స్పోర్ట్స్‌ కిట్‌లు, గడియారాలు, వెండి బంగారు ఆభరణాలు, ద్విచక్ర వాహనాలు, నాలుగు చక్రాల వాహనాలు, ఇతర ఖరీదైన వస్తువులు, బహుమతులు, పట్టపగలు ఇలా చేయడం విడ్డూరం.  ఇంత జరుగుతున్నా పోలీసులు, ప్రభుత్వ అధికారులు ఎటువంటి చర్యలు తీసుకోలేదు. ఈ ఉల్లంఘనలన్నింటినీ వాస్తవ ఆధారాలతో రుజువు చేస్తాం.’’ అని దాసోజు శ్రవణ్ పేర్కొన్నారు.

‘‘హుజూరాబాద్ ఉపఎన్నిక భారత ప్రజాస్వామ్య చరిత్రలోనే అత్యంత ఖరీదైన ఎన్నికగా పరిగణించబడుతుంది. టీఆర్‌ఎస్‌, బీజేపీ రెండూ అవినీతితో సంపాదించిన సొమ్మును ఎగరేసుకుపోతున్నాయి. ఒక్కో కవర్‌లో రూ.6000 నుంచి 10,000 వరకు పెట్టి పంచుతున్నారు. మద్యం కూడా యథేచ్ఛగా ప్రవహిస్తోంది. ఇన్ని అక్రమాలు, గందరగోళం జరుగుతున్నా అధికారులు చర్యలు తీసుకోవడం లేదు’’ అని దాసోజు శ్రవణ్ తీవ్ర ఆందోళన వ్యక్తం చేశారు.