భీమా ఇదేమి రామా?

వెలవెలబోతున్న భీమానదితో దిక్కుతోచని రైతులు

కృష్ణ, జూలై 11 (ఆంధ్రజ్యోతి) : మహారాష్ట్రలో పుట్టి కర్ణాటక రాష్ట్రం మీదుగా 851 కిలో మీటర్లు పారుతూ నారాయణపేట జిల్లా కృష్ణ మండలం తంగడిగి గ్రామ శివారులోని దత్తభీమేశ్వర దేవాలయం పక్కన కృష్ణానదిలో సంగమయ్యే భీమా నది వెలవెలబోతోంది... వందల టీఎంసీలను తీసుకువచ్చే ఈ నదికి ఎగువన వర్షాలు సమృద్ధిగా కురువక నదిలో నీరు లేక ఎడారిగా మారింది. బండలు తేలి, గంతల్లో నీరు నిలిచి ప్రైవేటు మోటార్లు పంపుల ఫుట్‌బాళ్లకు కూడా నీరు అందడంలేదు. దీంతో ఈ ప్రాంతంలో భీమా నది ఆధారంగా చేపట్టిన నారు మడులు ఎండుతున్నాయి. భీమా నది ఒడ్డున ఎత్తిపోతల పథకం పంపునకు నీరు లేక మూత పడింది. ఈ నది ఒడ్డున ఉన్న సుకురులింగంపల్లి, ఐనపూర్‌, కూసుమూర్తి, కళహళ్లి, తంగడిగి గ్రామ శివారులోని దాదాపు 5 వేల ఎకరాల వరి సాగు భూములున్నాయి. సన్న చిన్నకారు రైతులు, పెద్దరైతులు ఖరీఫ్‌, యాసంగి రెండు వరి పంటలు సాగు చేస్తూ జీవనోపాధి పొందేవారు. కానీ, ప్రస్తుతం దిక్కుతోచకుండా ఉన్నారు.