నగరాన్ని అభివృద్ధిలో అగ్రగామిగా నిలుపుతాం

కరీంనగర్‌ టౌన్‌, అక్టోబరు 14 (ఆంధ్రజ్యోతి):కరీంనగర్‌ను అభివృద్ధిలో రాష్ట్రంలోనే అగ్రగామిగా నిలుపుతామని మేయర్‌ కొలగాని శ్రీనివాస్‌ అన్నారు. బుధవారం నగరంలోని 21వ డివిజన్‌ శ్రీరాంనగర్‌కాలనీ రోడ్‌ నంబరు 7, దివ్యాంగుల కాలనీలో 20 లక్షల రూపాయలతో చేపట్టనున్న సీసీ రోడ్డు, డ్రైనేజీ నిర్మాణ పనులకు భూమిపూజ చేశారు. ఈ సందర్భంగా మేయర్‌ శ్రీనివాస్‌ మాట్లాడుతూ పార్టీలకతీతంగా నగరాన్ని అభివృద్ధ్ది చేస్తున్నామన్నారు. 21వ డివిజన్‌కు నగరంలోని 66 డివిజన్లలోనే అత్యధికంగా 6 కోట్ల నిధులు కేటాయించామని, అభివృద్ధి పనులు కొనసాగుతున్నాయన్నారు. 15వ ఆర్థిక సంఘం నిధుల నుంచి మంచినీటి పైపులైన్‌ నిర్మాణానికి 50 లక్షలు కేటాయించినట్లు తెలిపారు. కార్యక్రమంలో కార్పొరేటర్‌ కర్రె అనిల్‌కుమార్‌, ఆయా కాలనీల ప్రజలు, ఇంజనీరింగ్‌ అధికారులు పాల్గొన్నారు.