బద్దకం వదిలేదెలా..?

వర్షాకాలంలో తరచూ బద్దకంగా అనిపిస్తూ ఉంటుంది. దీని నుంచి ఎలా బయటపడాలో చూద్దాం...

• కష్టంగా అనిపించినప్పటికీ రోజూ ఒకే సమయానికి నిద్ర లేస్తే రోజంతా చురుగ్గా అనిపిస్తుంది.

• నిద్ర లేచిన వెంటనే దుప్పట్లు మడతపెట్టి బెడ్‌ సర్దేయాలి. కిటికీలు, తలుపులు తెరిచేస్తే తాజా గాలి లోపలికి ప్రసరిస్తుంది.

• వర్షం కారణంగా జిమ్‌కు వెళ్లాలనిపించకపోతే ఇంట్లోనే తేలికపాటి వ్యాయామాలు చేస్తే శరీరంలో రక్తప్రసరణ సజావుగా జరుగుతుంది. జీవక్రియల వేగం పెరిగి బద్దకం సులువుగా వదులుతుంది.

• ఉదయాన్నే అల్పాహారంతోపాటు తాజా పండ్లు తీసుకోవాలి. మితంగా డ్రై ఫ్రూట్స్‌ తినాలి. వేడివేడిగా హెర్బల్‌ టీ తాగితే ఉత్సాహంగా అనిపిస్తుంది.

• దాహం అనిపించకపోయినా గంటకోసారి కొద్దిగా మంచినీటిని తాగుతుంటే అలసట తీరుతుంది. ఒత్తిడి తగ్గుతుంది. ఏకాగ్రత, చురుకుదనం పెరుగుతాయి.

• చేయాల్సిన పనులను చిన్న చిన్న భాగాలుగా విభజించి త్వరగా పూర్తిచేయడానికి ప్రయత్నించాలి. దీనివల్ల పనులు వాయిదా వేసే ధోరణి తగ్గుతుంది. పనులు పూర్తవుతున్న కొద్దీ బద్దకంగా అనిపించదు.