కళ్లు కాంతివంతంగా...

అధిక పని ఒత్తిడి, నిద్ర లేమి, ఆహారపు అలవాట్ల కారణంగా కళ్ల చుట్టూ వాపు పెరగడం, కళ్ల కింద నల్లటి వలయాలు ఏర్పడడం, కళ్లు త్వరగా అలసిపోవడం లాంటి సమస్యలు ఎదురవుతుంటాయి. వీటిని నివారించే చిట్కాలివే...

• గులాబీ నీటిలో ముంచిన దూదిని కళ్లపై పెట్టుకుని అరగంట విశ్రాంతి తీసుకోవాలి. ఆపైన చల్లటి నీటితో కడిగేసుకుంటే అలసట తీరి కళ్లు ప్రకాశవంతంగా మారతాయి. ఎ విటమిన్‌, ఒమేగా 3 ఫ్యాటీ ఆమ్లాలు అధికంగా ఉండే పాలకూర, అవకాడో, కివీ పండ్లు, అవిసె గింజలు, చియా సీడ్స్‌, వాల్‌నట్స్‌, బాదం, సోయాబీన్స్‌, చేపలను తరచూ ఆహారంలో చేర్చుకుంటే కళ్లకు ఉపశమనం లభిస్తుంది.

• ఉడికించిన కోడిగుడ్లు, కేరట్లు, చిలగడ దుంపలు, నారింజ, ద్రాక్షలను తీసుకుంటుంటే సరైన పోషణ అంది కళ్లు తేమగా ఉంటాయి. కళ్లు ఎరుపెక్కడం, మండడంలాంటివి రావు.

• రాత్రి పడుకునేముందు టమాటా లేదా ఆలుగడ్డ రసాన్ని కళ్ల కింద అప్లయ్‌ చేసుకుని ఉదయాన్నే చల్లటి నీటితో శుభ్రం చేసుకుంటే నల్లటి వలయాలు మాయమవుతాయి. రోజూ బాదం నూనె, ఇ విటమిన్‌ ఆయిల్‌, జోజోబా ఆయిల్‌ రాసుకుంటున్నా ఫలితం ఉంటుంది.

• కీరను చక్రాల్లా కోసి పావుగంట ఫ్రిజ్‌లో ఉంచాలి. ఆపై వీటిని కళ్లపై ఉంచుకుని గంటసేపు విశ్రాంతి తీసుకోవాలి. దీనివల్ల రక్తప్రసరణ మెరుగై కళ్ల చుట్టూ వాపు తగ్గుతుంది.

• పోషకాహారం తీసుకుంటూ రోజుకు కనీసం ఆరు గంటలు నిద్ర ఉండేలా చూసుకుంటే ఎలాంటి కంటి సమస్యలూ దరి చేరవు.

Also Read:

తులసి ఆకులు నమిలితే కిడ్నీ స్టోన్స్ కరిగిపోతాయా?

ఈ డ్రై ఫ్రూట్స్‌ను మితంగా తినాలి.. ఎక్కువగా తింటే డేంజర్