ట్రోలింగ్‌ దాటిన విజయం

సండే సెలబ్రిటీ

అందం అంటే కేవలం కిలోల బరువు కాదు.. ఓ మహిళ సాధించిన విజయాలు, ఆమె ఆత్మవిశ్వాసమే అసలైన సౌందర్య కిరీటమని బాలీవుడ్‌ క్వీన్‌ కత్రినా కైఫ్‌ చాటిచెప్పింది. మాతృత్వం తర్వాత తన శరీరాకృతిపై వచ్చిన బాడీషేమింగ్‌ ట్రోల్స్‌ను హుందాగా ఎదుర్కొంది. వ్యాపారంలోనూ రికార్డులను తిరగరాస్తూ సరికొత్త ఐకాన్‌గా నిలిచిన ఆమె తన జీవితంలోని మాతృత్వపు మధురిమలు, ఎదుర్కొన్న విమర్శలు, విజయాలపై తాజా ఇంటర్వ్యూలో మనసు విప్పి మాట్లాడింది.

‘‘లండన్‌ మోడలింగ్‌ ప్రపంచం నుంచి ముంబై సినీ పరిశ్రమలోకి అడుగుపెట్టినప్పుడు నా మనసులో ఎన్నో ఆశలు, మరెన్నో సందేహాలుండేవి. కానీ, ఈ దశాబ్దాల ప్రయాణంలో భారతీయ ప్రేక్షకులు నాపై చూపించిన ప్రేమాభిమానాలు మాటల్లో చెప్పలేనివి. ఒక నటిగా భాషా సరిహద్దులను చెరిపేస్తూ.. కెరీర్‌ ప్రారంభంలో నటన, డ్యాన్స్‌, ఫిట్‌నెస్‌ విషయం లో నన్ను నేను మలచుకోవడానికి ఎంతో కష్టపడ్డాను. అగ్ర హీరోలతో నటిస్తూనే, ప్రత్యేక పాటలతో ప్రేక్షకులను అలరించడం ఆనందాన్నిచ్చింది. తెరపై నటిగా అలరించడమే కాకుండా, నూతన అధ్యాయానికి పునాది వేస్తూ ‘కే బ్యూటీ’ ద్వారా వ్యాపార రంగంలోకి అడుగుపెట్టాను.

మాతృత్వపు మధురిమలు

2021లో విక్కీ కౌశల్‌తో వివాహం తర్వాత నా జీవితం ఎంతో ఆనందంగా సాగుతోంది. 2025లో కుమారుడు విహాన్‌ జన్మించడం మధురానుభూతి. నటిగా వెండితెరపై ఎన్నో రకాల భావోద్వేగాలను పండించిన నాకు, నిజ జీవితంలో అమ్మగా మారడం అనేది అత్యున్నతమైన, పవిత్రమైన అనుభూతిని ఇచ్చింది. ఈ మాతృత్వం నాలో సరికొత్త పరిణతిని, బాధ్యతను నింపింది.

అంబానీ ఇంట వేడుకలతో వైరల్‌

బాబు పుట్టిన తర్వాత కొంతకాలంపాటు నా దృష్టంతా పూర్తిగా చిన్నారి మీదే పెట్టాను. బహిరంగ కార్యక్రమాలకు, షూటింగ్‌లకు దూరంగా ఇంట్లోనే ప్రశాంతంగా గడిపాను. ఇటీవల అంబానీ ఇంట్లో జరిగిన వినాయక చవితి వేడుకల కోసం భర్త విక్కీతో కలిసి తొలిసారిగా బయటకు వచ్చాను. అయితే, ఆ సమయంలో తీసిన ఫొటోలు, వీడియోలు సోషల్‌ మీడియాలో విపరీతంగా వైరల్‌ అయ్యాయి. ఆ వేడుక తర్వాత సోషల్‌ మీడియాలో జరిగిన పరిణామాలు నన్ను, నా కుటుంబ సభ్యులను కొంతవరకు ఆశ్చర్యానికి గురిచేశాయి. ప్రసవానంతరం నా శరీరంలో వచ్చిన సహజమైన మార్పులను పట్టుకుని కొందరు తీవ్రంగా బాడీ షేమింగ్‌కు దిగారు. బరువు పెరిగానని, నా పాత ఫొటోలతో పోలుస్తూ ‘ఈమె పని అయిపోయింది’, ‘గ్లామర్‌ పోయింది’.. వంటి కఠిన పదాలు ఉపయోగిస్తూ విమర్శలు చేశారు. ఇన్నేళ్లుగా ఎంతోమందికి ఫిట్‌నెస్‌ ప్రేరణగా నిలిచిన నేను.. తల్లి అయిన తర్వాత శరీరంలో వచ్చిన మార్పు ల వల్ల ఇలాంటి వ్యాఖ్యలు ఎదుర్కోవాల్సి వస్తుందని అస్సలు ఊహించలేదు.

మార్పులు సహజం

ఈ విమర్శలను చూసినప్పుడు నాకు సోషల్‌ మీడియాలో ఉన్న సంకుచిత భావాలు స్పష్టంగా అర్థమయ్యాయి. ప్రసవం అనేది ఒక మహిళ శరీరంలో ఎన్నో మార్పులను తీసుకువచ్చే సంక్లిష్టమైన ప్రక్రియ. ఆ సమయంలో శరీర బరువు పెరగడం అనేది అత్యంత సాధారణ విషయం. ప్రతి మహిళ శరీరం వేర్వేరుగా ఉంటుంది, మునుపటి స్థితికి రావడానికి పట్టే సమయం కూడా ఒక్కొక్కరిలో భిన్నంగా ఉంటుంది. బిడ్డ ఆరోగ్యంపై దృష్టి పెట్టాల్సిన సమయంలో, సమాజం నిర్ణయించిన అందాల ప్రమాణాల కోసం కంగారుపడటం ఏమాత్రం సమంజసం కాదని నేను బలంగా నమ్ముతాను.

అండగా నిలిచిన అభిమానులు

ఈ ట్రోల్స్‌ చూసి నేను మౌనంగా ఉన్నప్పటికీ, నా అభిమానులు, వేలాదిమంది మహిళలు సోషల్‌ మీడియా వేదికగా నాకు మద్దతుగా నిలవడం నాకు ఎంతో ధైర్యాన్ని ఇచ్చింది. ‘ఒక తల్లి శరీరాకృతిపై ఇలాంటి విమర్శలు చేయడం ఎంతవరకు సమంజసం?’ అని వారు విమర్శకులను నిలదీశారు. మహిళల ప్రసవానంతర మార్పులను గౌరవించాలని, వారి ఆకృతిని బట్టి కాకుండా వారు సాధించిన విజయాలను బట్టి చూడాలని గట్టిగా చెప్పారు. నా తోటి మహిళల నుంచి, సినీ పరిశ్రమలోని స్నేహితుల నుంచి వచ్చిన ఈ మద్దతు నాలో మరింత ఆత్మవిశ్వాసాన్ని నింపింది.

సినిమా ప్రయాణంలో నా స్థానం

నాపై వచ్చే సోషల్‌ మీడియా విమర్శలు నా కెరీర్‌ను లేదా నా విజయాలను ఎప్పటికీ తగ్గించలేవు. 2003లో ‘బూమ్‌’ సినిమాతో ప్రారంభమైన నా ప్రయాణంలో నటిగా నన్ను నేను నిరూపించుకుంటూ వచ్చాను. ఈ రోజున ఒక్కో సినిమాకు రూ. 10 కోట్లకు పైగా పారితోషికం అందుకుంటూ, అగ్ర కథానాయికగా కొనసాగుతున్నానంటే దానికి కారణం నా కష్టం, ప్రేక్షకుల ప్రేమే. ‘ఏక్‌ థా టైగర్‌’, ‘టైగర్‌ 3’ ‘జిందగీ నా మిలేగీ దుబారా’ వంటి చిత్రాల్లో నా నటనకు వచ్చిన గుర్తింపు నా కష్టానికి దక్కిన ప్రతిఫలం.

‘కే బ్యూటీ’ విజయం

కేవలం నటనకే పరిమితం కాకుండా, నేను స్థాపించిన ‘కే బ్యూటీ’ బ్రాండ్‌ ఈ రోజు భారతీయ కాస్మొటిక్‌ రంగంలో సాధిస్తున్న విజయం నాకు ఎంతో గర్వకారణంగా ఉంది. అన్ని రకాల చర్మ తత్వాలకు, ఛాయలకు సరిపడేలా రూపొందించిన ఉత్పత్తులకు విశేష ఆదరణ లభించింది. 2025-26 ఆర్థిక సంవత్సరంలో నా బ్రాండ్‌ దాదాపు రూ. 350 కోట్ల విలువైన అమ్మకాలను నమోదు చేయడం ఒక వ్యాపారవేత్తగా నా కల నెరవేరిన క్షణం. నటిగా, వ్యాపారవేత్తగా నేను సాధించిన ఈ విజయాల ముందు నాపై వచ్చే విమర్శలు చాలా చిన్నవిగా మారిపోతాయి.

ఉన్నతంగా నిలబెట్టేవి అవే...

ఈ అనుభవం ద్వారా నేను ప్రతి మహిళకు చెప్పాలనుకుంటున్నది ఒక్కటే. బాహ్య రూపం లేదా ఇతరుల వ్యాఖ్యలు మీ విలువను నిర్ణయించలేవు. మీ ప్రతిభ, మీ కష్టం, మీ ఆత్మవిశ్వాసమే మిమ్మల్ని ఉన్నతంగా నిలబెడతాయి. మాతృత్వం అనేది ఒక ఆశీర్వాదం, దానిని ప్రతి ఒక్కరూ ఆస్వాదించాలి. విమర్శలను పట్టించుకోకుండా, మన లక్ష్యాల వైపు, మన కుటుంబ ఆనందం వైపు అడుగులు వేయడమే మనం సమాజానికి ఇచ్చే సరైన సమాధానం. నా విజయాలు, నా ఆత్మవిశ్వాసమే నా అసలైన గుర్తింపు!

నా భార్య ఒక యోధురాలు.నటిగా, వ్యాపారవేత్తగా, ఇప్పుడు అద్భుతమైన తల్లిగా ఆమె తీసుకుంటున్న బాధ్యతలు నన్ను నిత్యం ఆశ్చర్యపరుస్తుంటాయి. సోషల్‌ మీడియాలో వచ్చే కొన్ని అనుచిత వాఖ్యలు ఆమె గొప్పతనాన్ని, ఆమె పొందుతున్న మాతృత్వపు ఆనందాన్ని ఏమాత్రం తగ్గించలేవు.

విక్కీ కౌశల్‌

కత్రిన భర్త, నటుడు

ప్రసవానంతరం శరీరంలో మార్పు లు ప్రతి తల్లికి ఎదురయ్యే సాధారణ అనుభవం. నేనూ ఆ కష్టాన్ని చూశా ను. తల్లిగా తన బిడ్డ క్షేమాన్ని చూసుకోవాలా? లేదంటే సోషల్‌ మీడియా ఒత్తిడితో బరువు తగ్గాలా? కత్రిన చాలా హుందాగా ఉంది. తల్లి అయిన మహిళల శరీరాలను గౌరవించడం మనం నేర్చుకోవాలి. - సమీరారెడ్డి

నేను కూడా మాతృత్వపు అనుభవాన్ని దాటి వచ్చాను. ప్రసవం తర్వాత శరీరం తిరిగి కోలుకోవడానికి తగినంత సమయం పడుతుంది. ప్రసవానంతర మార్పులను బాడీ షేమింగ్‌ చేయడం ఆపేయాలి. కత్రిన ఎప్పుడూ ఒక ఇన్‌స్పిరేషన్‌.. ఆమె సాధించిన విజయాలే ఆమె తరఫున మాట్లాడతాయి.

అలియాభట్‌

ఒక మహిళ జీవితంలో మాతృత్వం అనేది అత్యంత పవిత్రమైన గొప్ప ఘట్టం. ప్రసవం తర్వాత వారి శరీరంలో వచ్చే మార్పులు అత్యంత సహజమైనవి. ఏళ్లుగా ఇండస్ట్రీని ఏలుతున్న ఒక ఐకాన్‌ని, ఒక తల్లిని కేవలం శరీర బరువును బట్టి జడ్జ్‌ చేయడం చవకబారు సంస్కృతి. కత్రిన సాధించిన విజయాల ముందు ఈ ట్రోల్స్‌ చాలా చిన్నవి

సల్మాన్‌ఖాన్‌

మహిళల శరీరాలపై, వారి ఆకృతులపై వాఖ్యలు చేయడం సోషల్‌ మీడియాలో ఒక చెడు అలవాటుగా మారింది. ఒక నటి బిడ్డకు జన్మనిచ్చిన తర్వాత కూడా ప్రేక్షకులు మునుపటి గ్లామర్‌ బాడీనే కోరుకోవడం ఎంతవరకు న్యాయం? కత్రిన ఒక శక్తిమంతమైన మహిళ. ఆమె ఆత్మవిశ్వాసాన్ని ఇలాంటి ట్రోల్స్‌ ఏమాత్రం తగ్గించలేవు.

సమంత

‘ఇట్స్‌ కె టు బి యు’

ఈ వివాదంపై నేను చెప్పదలచుకున్నది ఒక్కటే. ఇతరుల వ్యాఖ్యల కంటే మన మానసిక ప్రశాంతత, స్వీయప్రేమ చాలా ముఖ్యమైనవి. ఇతరులు విధించే చట్రంలో ఇమడటానికి మన శరీరాన్ని లేదా మనసును కష్టపెట్టుకోవాల్సిన అవసరం లేదు. నా కాస్మొటిక్‌ బ్రాండ్‌ ‘కే బ్యూటీ’ ద్వారా నేను ఎప్పుడూ చెప్పే మాట ‘ఇట్స్‌ కె టు బి యు’ (నువ్వు ఎలా ఉంటే అలాగే ఉండటం అందం). ప్రతి ఒక్కరు తమ సహజత్వాన్ని ప్రేమించాలి. ప్రసవానంతరం నా శరీరంలో వచ్చిన మార్పులను నేను గౌరవిస్తాను, ఆస్వాదిస్తాను.

ఇవి కూడా చదవండి:

శుభ్‌మన్ గిల్ గాయంపై స్పందించిన టీమిండియా

నేను చేయాల్సిన పని మిగిలే ఉంది.. రోహిత్ శర్మ కీలక వ్యాఖ్యలు