ఇలా శుభ్రం

ఫ్రిజ్‌ డోర్‌ అంచుల్లో ఉండే రబ్బర్‌ సీల్‌ లోపల తరచూ మురికి చేరుతుంటుంది. దీన్ని ఎలా శుభ్రం చేయాలంటే...

• ఈ రబ్బర్‌ సీల్‌ లోపల ఆహార పదార్థాల అవశేషాలు, తేమ, దుమ్ము పేరుకుపోయి క్రమంగా నల్లమచ్చలు ఏర్పడవచ్చు. వీటిని జాగ్రత్తగా పొడి చేతి రుమాలుతో తుడుస్తూ శుభ్రం చేయాలి. ఆ సమయంలో రబ్బర్‌ సీల్‌ ముడుతలను గట్టిగా సాగదీయకూడదు.

• గిన్నెలో గోరువెచ్చటి నీటిని తీసుకుని నాలుగైదు చుక్కల డిష్‌ వాషింగ్‌ లిక్విడ్‌ వేసి బాగా కలపాలి. అందులో ఇయర్‌ బడ్స్‌ లేదా పాత టూత్‌ బ్రష్‌ను ముంచి దానితో రబ్బర్‌ సీల్‌ ముడుతలను శుభ్రం చేయవచ్చు.

• చెంచా బేకింగ్‌ సోడాలో కొద్దిగా నిమ్మరసం వేసి పేస్టులా కలపాలి. దీన్ని పాత టూత్‌బ్రష్‌తో అద్దుతూ సీల్‌ ముడుతల లోపల రాసి పది నిమిషాలు నాననివ్వాలి. తరువాత పలుచని చేతి రుమాలుతో తుడిచేస్తే మురికి, జిడ్డు, బూజు పూర్తిగా తొలగిపోతాయి.

• కప్పు నీటిలో చెంచా వెనిగర్‌ వేసి కలిపి అందులో ముంచిన స్పాంజ్‌తో తుడుస్తూ రబ్బర్‌ సీల్‌ను శుభ్రం చేయవచ్చు.

• బాగా మురికిగా ఉన్న చోట తెల్లటి టూత్‌పేస్టు రాసి రెండు నిమిషాల తరువాత పలుచని గడ్డతో తుడిచేస్తే సరిపోతుంది.

• శుభ్రం చేసిన తరువాత ఈ రబ్బర్‌ సీల్‌ లోపల తడి లేకుండా ఆరనివ్వాలి. లేదంటే తేమ వల్ల ఫంగస్‌, బూజు ఏర్పడి సీల్‌ పాడయ్యే ప్రమాదముంటుంది.

ఇవి కూడా చదవండి:

శుభ్‌మన్ గిల్ గాయంపై స్పందించిన టీమిండియా

నేను చేయాల్సిన పని మిగిలే ఉంది.. రోహిత్ శర్మ కీలక వ్యాఖ్యలు